परंपरीक वेवसाय पुनर्जिवीत करात

भांगरभूंय | प्रतिनिधी

अरुणा वाघः वास्को मनयलो आंतरराष्ट्रीय महिला दीस

भांगरभूंय । प्रतिनिधी

मुरगांवः फक्त सरकारी नोकरे फाटल्यान धांवा नासतना आपल्या समाजाचो परंपरीक वेवसाय पुनर्जिवीत केल्यार स्वता आत्मनिर्भर जावं येता. नुस्तेमारी सारक्या वेवसायाक चालना दिल्यार खूब फायदो जावं येता. हे खातीर ह्या समाजा कडल्यान विवीध तरांच्यो कार्यावळी आयोजीत करून समाजाक एकवटींत दवरपा खातीर केल्ले यत्न खऱ्यांनीच तुस्त करपा सारके आसात, अशें मत सेंट्रल बोर्ड फॉर एज्युकेशनची संचालक अरुणा वाघ हांणी सांगलें.

23 मार्चाक बायणाच्या रवीन्द्र भवनाच्या सभाघरांत गोवा क्षत्रीय मराठा समाज मुरगांव फांटो महिला विभागा वतीन आंतरराष्ट्रीय महिला दीस आयोजीत केल्लो. हे कार्यावळींत वाघ मुखेल सोयरी म्हूण उलयताली.

ह्या वेळार माचयेर मानाची सोयरी म्हूण गणपत कॉलेज ऑफ एज्युकेशनची प्राध्यापकर वैशाली वासुदेव परब, गोवा क्षत्रीय मराठा समाज केंद्रीय समितीचे अध्यक्ष पद्मनाभ आमोणकार, छात्रांगना सचीव सुप्रिया वळवयकार, गोवा क्षत्रीय मराठा समाज मुरगांव फांट्याचे अध्यक्ष प्रा. सुनील शेट, महिला विभाग अध्यक्ष अक्षदा वाडेकार, सरचिटणीस वैशाली आमोणकार, भांडारी रिया नार्वेकार, सल्लागार समितीची अध्यक्ष रेखाताई आमोणकार हाजीर आशिल्ली.

प्रा. वैशाली परब हांणी सांगलें, समाजांत बायलांची सुवात खुबूच म्हत्वाची आसा. ती सांबाळून दवरचे खातीर आयोजकांनी केल्लो यत्न कवतुकाचो आसा.

ह्या वेळार वाघ हांचे हस्तुकीं शाल, श्रीफळ, फुलांतुरो, यादस्तीक चिन्न आनी भेटवस्तू दिवन डॉ. सपना अतुल नायक कोचरेकार (नाच), डॉ. स्नेहांकिता सुनील शेट (वैजकी आनी संगीत), दिप्ती हरीष चोडणकार (गायन) आनी दिक्षा देवानंद आमोणकार (खेळ) हांचो उत्कृश्ट कामगिरी खातीर सत्कार केलो.

अर्चनाताई कोचरेकार, सुनयना शेट, संतोषी फडते, सुमित्रा आमोणकार हांणी मुखेल सोयरी आनी सत्कारमुर्तींची वळख करून दिली.

ह्या वेळार अनन्या धावडे, प्रियांशा कोळंबकार, प्रज्ञा देसाय, युतिका चोडणकार, गीता शेट्टी, माऊली सेल्फ हेल्प ग्रुप, सडा, साईएकता मंडळ सडा हांणी सोलो तशेंच सांघीक नाच सादर केलो. सगळ्या जैतिवंतांक मानेस्तां हस्तुकीं इनामां भेटयलीं. दिवली पेटोवन कार्यावळीची सुरवात जाली. अक्षदा वाडेकार हांणी येवकार दिलो आनी प्रास्तावीक केलें. सुनयना शेट हांणी सुत्रसंचालन केलें जाल्यार वैशाली आमोणकार हांणी उपकार मानले.