भांगरभूंय | प्रतिनिधी
मिठागरांक मेळटली ५० हजारांची मदत
पणजी : पोदेर, नुस्तेंकार, फुलकार, पाडेली, खाजेंकार हांकां वळखपत्रां दिवपा सयत आदार दिवपी येवजण सूरू जातली. राज्यांत जीं १० ते १५ मिठागरां उरल्यांत तांकां ५० हजार रुपयांची अर्थीक मजत दिवपी येवजण सुरू जातली. गोंयची अस्मिताय, वेगळेंपण जपपा खातीर सगल्यांनी येत्न करपाची गरज आसा, असो उलो मुख्यमंत्री डॉ. प्रमोद सावंत हांणी मारलो.
पणजे इन्स्टिट्यूट मिनेजीस ब्रागांझा सभाघरांत आयज अस्मिताय दिसाची कार्यावळ जाली. हे कार्यावळींत मुख्यमंत्री डॉ. सावंत हे मुखेल सोयरे म्हूण उलयताले. राजभास संचालनालयान हे कार्यावळीचें आयोजन केल्लें.
१९४७ वर्सा देश स्वतंत्र्य जालो. हाचे उपरान १९६१ वर्सा गोंय मुक्त जालें. भाशेचेर आदारीत राज्यांची निर्मिती जाली. गोंय हें कोंकणी भाशक राज्य थारलें. गोंय स्वतंत्र उरचें काय महाराष्ट्रांत विलीन जावचें हें थारोवपा खातीर जनमत कौल घेतलो. गोंयकारांनी स्वतंत्र रावपाचो कौल दिल्ल्यान गोंय वेगळें राज्य जालें. ना जाल्यार गोंय हो एक जिल्लो आसतलो आशिल्लो, अशें डाॅ. सावंत हांणी सांगलें.
पर्यटन, सादनसुविधा तशेंच सगल्या मळाचेर गोंयात व्हडा प्रमाणांत उदरगत जाल्या. खोलाची मिरसांग, ताळगांवचीं वायंगीं हांचे सयत १५ वस्तूंक जीआय टॅग मेळ्ळा. गोंयची वळख जपपा खातीर खाजें तशेंच हेर परंपरीक उत्पादनां सांबाळून दवरपाची गरज आसा. पेडण्यां आनी तिसवाडी म्हालांत मेळून १० ते १५ मिठागरां उरल्यात. हीं मिठागरां उरली ना जाल्यार तीं फकत पुस्तकांतूच वाचपाक मेळटलीं, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
