भांगरभूंय | प्रतिनिधी
लावधारकां मदीं निरशेवणी
भांगरभूंय I प्रतिनिधी
पणजी : समाज कल्याण खात्या वरवीं परंपरीक वेवसायिकांक अर्थीक मजत आनी ग्रामविकास खात्या वरवीं अंमलबजावणी जावपी फुकट गॅस सिलिंडर दिवपी येवजण अजुनूय कागदाचेरूच उरल्या. परंपरीक वेवसायिकांक पांच हजार रुपया अर्थीक मजत चवथी पयलीं मेळटली, अशी घोशणा मुख्यमंत्री डॉ. प्रमोद सावंत हांणी केल्या, पूण निर्धारीत वेळांत ती पुराय जावपाची शक्यताय उणीच आसा.
राज्यांत कोवीड काळांत अर्थीक संकश्टांत सांपडिल्ल्या परंपरीक वेवसायिकांक दरेकी पांच हजार रुपया दिवपाचे घोशणेक देड वर्स पुराय जालां. हे येवजणेचो लाव मेळोवपाक समाज कल्याण खात्या कडेन लाखां वयर अर्ज आयिल्ले. तातूंतल्या अजुनूय सुमार 88 हजार अर्ज छाननी जावंक नाशिल्ल्यान प्रलंबीत आसात. उरिल्ल्या अर्जांक खात्या कडल्यान मंजुरी मेळ्ळ्या. पूण ते विशींची फुडली प्रक्रिया अजुनूय कागदाचेरूच आसा. चवथी मेरेन मंजूर जाल्ल्या अर्जदार वेवसायिकांक अर्थीक मजत दितले, अशी हमी मुख्यमंत्री डॉ. सावंत हांणी विधानसभा अधिवेशनांत दिल्ली. ते खातीर सर्वसामान्य वेवसायिकांक थाकाय मेळिल्ली. पूण चवथीक आतां फक्त 14 दीस उरल्यात आनी प्रशासना कडल्यान ते
नदरेन कसल्योच हालचाली जायनात, अशी म्हायती समाज कल्याण खात्याच्या अधिकाऱ्यां कडल्यान मेळ्ळ्या.
अर्थसंकल्पीय भाशणांत मुख्यमंत्री डॉ. प्रमोद सावंत हांणी केल्ले घोशणे प्रमाण ‘बीपीएल’ धारकांक वर्सुकीं तीन गॅस सिलिंडर फुकट मेळटले हे निश्चीत. हे येवजणेची अंमलबजावणी करपी ग्रामविकास खात्यान हे विशींची प्रक्रिया पुराय करून फायल सरकाराक धाडल्या. पूण ते विशींची अधिसुचोवणी अजून जारी जावंक नाशिल्ल्यान तशेंच फुकट गॅस सिलिंडराचोय लाव मेळचो ना, ते खातीर ‘बीपीएल’ धारकां मदीं निरशेवणी पातळ्ळ्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
