भांगरभूंय | प्रतिनिधी
डिजिटल युगांत भुरग्यापणाची संस्कृती शेणटा, गड्डे वांटावपाचो पालक- शिक्षकांचो यत्न
भांगरभूय । प्रतिनिधी
केरी- सत्तरी : आमच्या देशांतल्या दरेका भुरग्याच्या भुरग्यापणाची खरी वळख म्हणल्यार खेळ. आनी तातूंत परंपरीक खेळांक विशेश म्हत्व आसा. आदल्या काळार भुरगीं शाळेंतल्यान घरा आयले उपरांत वाड्यार, आंगणांत वा मैदानार गड्ड्यांनी, लगोरी, भोंवरो, फुगडी, लिपच्याल्यांनी अशे साबार खेळ खेळटाले. ह्या खेळांतल्यान फक्त मनरिजवण जायनाशिल्ली जाल्यार इश्टागत, शिस्त, सर्त आनी सांघीक भावना वाडटाली. मात आयच्या डिजिटल युगांत परंपरीक गड्ड्यांचो खेळ ना जावपाचे वाटेर आसा.
एका काळार वाड्यांचेर आंगणांत ‘टक… टक…’ असो गड्डे आपटिल्ल्याचो आवाज घुमतालो आनी भुरग्यांच्या हांसपांत अख्खो वाडो गाजतालो. आयज तेंच आंगण शांत जालां. हातांत गड्डे नात, मोबायलाची स्क्रीन आसा. भुरग्यापणांतलो हो खेळ आतां उगडासांतूच शेणत चल्ला. मोबायल, इंटरनॅट आनी गेमींग अॅप्साच्या ह्या युगांत भुरग्यांचें भुरगेंपण डिजिटल पड्ड्या फाटल्यान शेणत आसा.
एका काळार दरेकल्याच्या बोल्सांत आशिल्ल्यो रंगीत कंवच्यांचे गड्डे आतां इतिहास जमा जातना दिसतात. भारतीय संस्कृतींत खेळ ही फक्त मनरिजवण न्हय जाल्यार जीणेशैलीचो भाग आशिल्लो. तातूंत गड्डे हो भुरग्यापणाचो वेगळो जावपाक शकना असो सांगाती आशिल्लो. पूण काळाच्या प्रवाहांत हो परंपरीक खेळ आतां नानपयत जावपाचे वाटेर आसा.
गड्ड्यांचो खेळ हो खूब सादो, पूण कुशळटाय, अचुकता आनी एकाग्रतेचो संगम आशिल्लो खेळ. रंगरंगयाळ्या कंवच्यांचे ल्हान गड्डे जमनीर उडोवन, एका गड्ड्याचेर दुसरो गड्डो बोटान अचूक मारप हें ह्या खेळाचें मुख्य तंत्र. हातूंत दोळे आनी हात हांचो समन्वय, वेग तशेंच संयमाचे गूण विकसीत जातात. भुरग्यां मदीं संवाद, आदार आनी भलायकेक पुरक सर्तीची भावना निर्माण करपी हो खेळ आयज मात मोबायल, व्हिडियो गेम्स आनी टीव्हीचे भकीक पडला. शार वाठारांत मैदानांचो उणाव, अभ्यासाचो ताण आनी डिजिटल साधनांच्या व्यसनांक लागून भुरग्यांक परंपरीक खेळांची वळख उरूंक ना.
तरी लेगीत कांय शिक्षक, पालक आनी समाजीक संस्था हे शेणिल्ले संस्कृतीक जिवीत दवरचे खातीर फुडाकार घेतात. कांय शाळांनी ‘लोकखेळ दीस’, ‘बालखेळ सर्त’ वा ‘भुरग्यांचें परंपरीक खेळ प्रदर्शन’ आयोजीत करतात. कांय पालक आपल्या भुरग्यांक सांजे वेळार आंगणांत बसून गड्ड्यांनी खेळपाक शिकयतात. अश्या उपक्रमांतल्यान भुरग्यांक आपले संस्कृती कडेन जोडटात आनी तांकां मोबायलाचे भकीक पडनासतना खेळांतल्यान शारिरीक आनी मानसीक उदरगत करपाची उर्बा मेळटा. संस्कृतींत रुजिल्ले अशे खेळ फक्त मनरिजवणे खातीर नात जाल्यार भुरग्यांचे व्यक्तीमत्व उदरगती खातीर लेगीत खूब म्हत्वाचे आसात. आयची पिळगी आनी पालक मेळून हे खेळ परतून नवे उमेदीन सांबाळ्ळे, जाल्यार गड्ड्यांचो खेळ आनी ताचे वांगडा खोशयेचें भुरगेंपण परतून एकदां आपल्या आंगणांत फुलतना दिसतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
