भांगरभूंय | प्रतिनिधी
मुख्यमंत्री डॉ. प्रमोद सावंतः सांखळी बालभवनाचें रंगलें बालसंगीत संमेलन
भांगरभूंय । प्रतिनिधी
दिवचलः गोंयची रुढी परंपरा सांबाळपाचे नदरेन बालभवनाचो वावर तोखणायेचो आसा, अशें मुख्यमंत्री डॉ. प्रमोद सावंत हांणी सांगलें. तशेंच गोंयच्या बालभवन केंद्रांतल्या भुरग्यांक माची मेळोवन दिवचे खातीर आपलो पुराय आदार आसतलो, अशी हमी तांणी दिली.
भुरग्यांच्या आंगांतली सृजनात्मकता सोदून ती विकसीत करून भुरग्यांक उर्बा दिवन बऱ्यांतली बरी माची दिवपाचें काम बालभवन करता. होच उद्देश नदरे मुखार दवरून बालभवनान सांखळी रवीन्द्र भवनाच्या पालवान बालसंगीत संमेलनाचें आयतारा 5 जानेवारीक आयोजन केल्लें. उत्तर गोंयांतल्या बालभवन केंद्रांतल्या भुरग्यांनी ह्या संमेलनांत आपली कला सादर केली. हे कार्यावळीचें मुखेल सोयरे तशेंच उद्घाटक म्हूण मुख्यमंत्री डॉ. सावंत उलयताले. तांचे वांगडा सांखळेची नगराध्यक्ष सिद्धी प्रभू पोरोब, पाळी मतदारसंघाचे जिल्हो पंचायत गोपाळ सुर्लकार, रवीन्द्र भवन सांखळीचे उपाध्यक्ष आनंद काणेकार, कानसेकार, बालभवनाचे संचालक मनोज सावयकार, कार्यावळ अधिकारी शशिकांत पुनाजी, सहाय्यक लेखा अधिकारी लक्ष्मीदास मणेरकार, रिसोर्स पर्सन कमलाकांत गांवस हाजीर आशिल्ले.
ह्या बालसंगीत संमेलनांत उत्तर गोंयांतलीं होंडा, ठाणे, अडवय/ वेळगें, पिळगांव, दिवचल, चांदेल, दिवाडी, आमोणें/ न्हावेली, दिवचल, अस्नोडें, सांखळी, हरमल, पोंबुर्फा, म्हापशें, वाळपय, नगरगांव, इब्रामपूर, कारापूर, वारखंड, शिवोली, नेरूल ह्या बालभलन केंद्रांतल्या 350 भुरग्यांनी दोळे दिपकावपी सांस्कृतीक कार्यावळ सादर केली.
भुरग्यांक शास्त्रीय संगिताची आवड निर्माण जावची, तशेंच प्रतिभावंत बालभलनाच्या भुरग्यांक माची मेळची, अश्या कार्यावळींतल्यान नवे बालकलाकार तयार जावचे ह्या उद्देशान मुख्यमंत्री डॉ. सावंत हांचे संकल्पनेचेर आदारीत हें बालसंगीत संमेलन आयोजीत केल्लें.
मनोज सावयकार हांणी प्रास्तावीक केलें आनी येवकार दिलो. तांणी बालभवनाच्या भुरग्यां खातीर आशिल्ल्या विवीध उपक्रमांची म्हायती दिली. तशेंच बालभवनाच्या विकासात्मक धोरणां खातीर गोंय सरकाराचो आदार मेळटा म्हूण उपकार मानले. बालभवनाचे वरिश्ठ प्रशिक्षक महेश गांवस हांणी उक्तावण सुवाळ्याचें सुत्रसंचालन केलें. सांस्कृतीक कार्यावळीचें सुत्रसंचालन सांखळी बालभवनाची विद्यार्थिनी अद्विता नायक आनी हेर केंद्रांतल्यान आयिल्ल्या भुरग्यांनी केलें. कमलाकांत गांवस हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
