पयसो

भांगरभूंय | प्रतिनिधी

हिंदू शास्त्रांत अर्थाक एक पुरुषार्थ म्हणला. ‘अर्थ’ म्हणल्यार पयसो. धर्म-अर्थ- काम-मोक्ष हे चार पुरुषार्थ. मनशान निदान गरजे पुरतो पयसो जोडपाकूच जाय. पूण तो उजू मार्गान जोडचो.

पयसो. एक म्हत्वाचो घटक जाचे विशीं अपसमज आसात. कांय लोक म्हणटात Money Can’t Buy Everything, म्हणल्यार पयसो सगळेंच विकतें घेवपाक शकना.
खरें. पयशे आसतकच सगळेंच जाग्यार पडटा अशेंय ना. कांय गजाली सैमान आपल्या हातान दवरल्यात. मनीस गेल्लो वेळ, गेल्लें तारुण्य विकतें घेवपाक मेळना. पयशान मरण टाळपाक मेळना. मरण आयिल्ल्या लागीच्या मनशाक परत जिवो करपाक शकना. पयशान नशीब विकतें घेवपाक शकना.
आमकां जितलो दिसता खऱ्यांनीच पयसो तितलो म्हत्वाचो आसा? पळोवया.
Poverty Can’t Buy Anything— म्हणल्यार गरिबी कांयच विकत घेवपाक शकना. मनशाच्यो मूळ गरजो भागोवपा इतलो पयसो जायच. मनीस कितलोय बरो वा तत्वनिष्ठ आसूं, ताणें आपलो भार दुसऱ्याचेर घालपाक जायना. घडये तेन्नाच तो तत्वां जपूंक पावतलो. आपल्या भितर आयिल्लें बरेंपण जपूंक पावतलो.
बरें निरोगी जिवीत, स्वास्थ्य, मनाची शांतताय, बरीं नातीं, हें खूब म्हत्वाचेंच. पूण जिवीत स्वाभिमानान जगपाक हातांत पयसो जाय हें सत. पयसो फकत मजा मारपा खातीर आसना, जाल्यार तत्वां कोणेंच विकत घेवचीं न्हय ही पाळी न येवपा खातीर आसता. हातान उजू मार्गान जोडिल्लो पयसो आसल्यार दानधर्म करूं येता. समाजांत बरे उपक्रम राबोवपाक येता. भुरग्यांक बरें उच्च दर्जाचें शिक्षण दिवं येता. हातान पयसो आसतकच आपलो वेळ आपल्याक जाय तसो वापरूं येता. जाच्या हातान पयसो घोळटा ताका मन मारून जगचें पडना.
पयसो स्वातंत्र्य दिता, स्थैर्य दिता, सुरक्षितताय दिता आनी सगळ्यान म्हत्वाचें स्वाभिमान राखपाक मदत करता.
हिंदू शास्त्रांत अर्थाक एक पुरुषार्थ म्हणला. ‘अर्थ’ म्हणल्यार पयसो. धर्म-अर्थ- काम-मोक्ष हे चार पुरुषार्थ. मनशान निदान गरजे पुरतो पयसो जोडपाकूच जाय. पूण तो उजू मार्गान जोडचो.
पयसो वायट न्हय. पूण चडांत चड पयसो जोडपाक ज्यो वायट गजाली मनीस करता, सामको उणाक पांवड्यार देंवता तें वायट. पयशा खातीर चोरी करप, दुसऱ्यांक नागोवप वायट. भ्रश्टाचार करप वायट. वायट मार्गान पयसो जोडप ही वृत्ती वायट.

संपदा कुंकळकार
9850149319