भांगरभूंय | प्रतिनिधी
सैमा लागीं आमी सदांच नाते जोडपाचो यत्न करपाक जाय. कारण जल्मा सावन मरणा मेरेन सैम आमकां मजत करीत आसता, नाजाल्यार आमच्या वांगडा तरी आसताच. आमी ट्रेकिंग, सुकणी निरीक्षण करप, उदकांतले खेळ, जमनी वेले साहसी खेळ, रानांनी भोवंडी करप, किल्ले, दोंगरार वचप, अशे जायते पद्धतीन सैमा कडेन नातें जोडीत आसतात. उदक तर आमकां सदांच जाय. चड उदक आसत तर आमी खेळ खेळूं शकतात. आतां कांय कडेन उदक आसा काय रेंवट हें कोण तरी थंय वतकच कळटालें, पूण आतां रिमोट सेन्सिंग तंत्रज्ञाना खातीर हें काम खूब सोंपें जालां. पयसुल्ल्यान कामां करप हें सदांच सुरक्षित. देखीक आमी इलेक्ट्रिशियनाचें काम पळोवया. ताका पावसान काम करचें पडटा. हें धोक्याचें आसता, पूण हेंच काम जर रोबोटान केलें तर लायनमनाक जिवाचो तरी सुशेग मेळूं शकता. पयसुल्ल्यान आमी उपगिऱ्याचे मजतीन कितलीशीच म्हायती घेवपाक शकतात आनी तातूंतल्यान उपाय काडूं शकतात.
जेन्ना सुनामीन मनीस आनी मालमत्तेचें लुकसाण जालें तेन्ना वानरांनी, सुकण्यांनी तशेंच काय आदिवासी लोकांनी उंचायेचेर रावन आपलो जीव वाटायलो. आमका जर सुकण्यांची, वानरांची भास आयिल्ली तर कितलें बरें जावपाचें? हांचेर कांय लोक काम करतात, हातुंतल्यान तांकां पयशे जरी मेळना तरी मनीसजातीक आमी कितें तरी दिवं शकले हें समाधान नक्कीच मेळटा. पयसुल्ल्यान नियंत्रण हाडपाचें शिक्षण घेवपी गोंयांत वास्को हांगां माधुरी बांदेकार- निफाडकार आसा. तिका नकासो अभ्यासाची, तो पळोवपाची आदी सावन आवड. हातूंत तिणें मुंबय विद्यापीठान भूगोल विशय घेवन एमए केली आनी तिणें रिमोट कंट्रोल डिप्लोमा करपाचें मनान थारायलें. तिणें हैदराबादेक शिक्षण घेतलें. तेन्ना थंयंच शिक्षण मेळटालें. आतां शिकपाची संद वाडल्या. चौगुले कॉलेजींत हें शिक्षण आयज मेळटा. नेटाचेर सोदशात तर आनीकूय संस्था मेळूं शकतात. ह्या पयस तंत्रज्ञाना खातीर तुमी जैव विवीधताय, उदकाच्यो, वाळवंटाच्यो, बर्फाच्यो सुवाती
सोदूं शकता. वातावरण बदल जायत आसा, ताचे कारण सोदपाक ताची मजत जावं येता. आमचे चडशे प्रश्न, समस्या पयस करपाक ह्या तंत्रगिन्यानाचो आमकां उपेग जावं शकता. मधुराक
इस्रोच्या फाट्यांत नोकरी मेळ्ळ्या, हें जरी खरें आसलें तरी समाजा खातीर आपुण कितें तरी करता, हांचे समाधान तिका नक्कीच मेळटा.
सैम आमकां जल्मा सावन मरणा मेरेन सांगात दिता. फक्त वांगडाच न्हय तर मजत लेगीत करता, पूण आमी मात तो काबार करपाक लागल्यात. हालींच म्हादयच्या वाठारांत तशेंच गोंयच्या कांय वाठारांनी उजो लागपाच्यो गजाली घडल्यो. तो पालोवपाक काय दीस लागले. पूण ताच्या खातीर कितलीशीच जैवविवीधताय काबार जाली. हें लुकसाण कोण भरून काडटलो? तज्ञांच्या
मतान हाका जायतो तेंप लागतलो. रिमोट कंट्रोल तंत्रज्ञानान असल्यो घडणुको रोखड्योच कळटल्यो आनी ताचेर उपाय काडूंक मेळटलो.
रानाची भोंवडी, ट्रेकिंग, सुकणीं निरीक्षण करप आसूं नाजाल्यार उदकांतले साहसी खेळ हें सगळें आमकां सैमा लागीं नाते जोडपाक खूब मजत करता. सैमा कडे आमी नाते निर्माण करपाक जाय. संत तुकारामान तर ‘वृक्ष वल्ली आम्हा सोयरी’ अशें म्हणलां. आतां रोखडोच बारावेचो निकाल लागपाचो आसा. तुमी वेगळे वाटेन व्हरपी रिमोट सेन्सिंग ह्या पर्यायांचो जरूर विचार करचो. ताचे पयलीं भुगोला कडे तुमी लक्ष दिवचे तसेच नक्सो पळोवन ताचो अभ्यास करपाक शिकचें. कित्याक तर रिमोट सेंसिंगाच्या भितर उपगिऱ्याच्या मजतीन जे फोटो मेळटात ते कळपाक सोंपें जावं शकता. हें तंत्रज्ञान मनशाक म्हायती मेळपाक खूब बरें पडूं शकता, दक्षीण इजिप्तांत एका काळार हवामान ओलें आशिल्लें आतां थंय रेंवट आसा. ह्याच मजगतीं पश्चीम घांट, पूर्व पश्चिम हिमालयचो वाठार हांगां आशिल्ल्या जैवविवीधतेची म्हायती ‘ज्युनिअर फेलो’ म्हूण काम करपी मधुरा आनी तिच्या सहकाऱ्यांनी एकठांय केली. खंय कितें आसा? खंयच्या वाठारांनी कितें उणें आसा? हाची म्हायती मेळप आतां सोंपें जातलें.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
