भांगरभूंय | प्रतिनिधी
मुख्यमंत्री डॉ. प्रमोद सावंत हांचो राज्य सहकारी बँकांक उलो
भांगरभूंय । प्रतिनिधी
पणजीः सहकारी सोसायटींतल्या लोकांचे पयशे बुडचे न्हय हे खातीर सहकार कायद्यांत बदल सुचोवपाचे आसात जाल्यार सहकार निबंधका कडेन सुचोवण्यो दिवच्यो, असो उलो मुख्यमंत्री डॉ. प्रमोद सावंत हांणी मारलो. शुकारा राज्य सहकारी बँकेच्या 60 व्या वर्धापन दिसा निमतान आयोजीत कार्यावळींत ते उलयताले.
ह्या वेळार सहकार मंत्री सुभाष शिरोडकार, बँकेचे अध्यक्ष उल्हास फळदेसाय, उपाध्यक्ष पांडुरंग कुर्टीकार, निबंधक अरविंद बुगडे, नाबार्डाचे संदीप धारकार आनी हेर अधिकारी हाजीर आशिल्ले.
फाटल्या कांय वर्सांत सहकारी बँकेंतल्या लोकांचे पयशे बुडपाचें प्रमाण वाडलां. अश्यो बँको वा संस्थांचीं नांवां आयज आपूण घेवचों ना. लोकांचे पयशे सुरक्षीत उरचे हे खातीर सहकार कायद्यांत वेळावेळार बदल करपाची आमची तयारी आसा. सहकारी बँक, संस्था वा वैयक्तीक पांवड्यार सहकार कायद्यांत बदल करचे खातीर सरकाराक लेखी स्वरुपांत सुचोवण्यो दिवच्यो. ताचेर आमी निश्चीत विचार करतले, अशें मुख्यमंत्री डॉ. सावंत हांणी सांगलें. राज्य सहकारी बँकेन 60 वर्सांच्या काळांत खूबशे चड- उतार पळयले. सरकारान वेळावेळार केल्ली मजत आनी ठेवीदारांचो विस्वास हाकाच लागून बँक आयज बरे स्थितींत आसा. बँकेन तरणाट्यांक स्वयंपूर्ण जावचे खातीर मजत करपाक जाय. सहकार मळार तरणाट्यांक हाडचे खातीर काम करपाक जाय. फलोत्पादन, नुस्तेमारी वेवसायांत कोल्ड चेन आसप गरजेचें आसता. बँकेन ह्या मळार सहकारी संस्था तयार जातल्यो, हे खातीर यत्न करपाक जाय, अशेंय मुख्यमंत्री डॉ. सावंत हांणी सांगलें.
‘सहकारी बँकांनी काळा प्रमाण बदलचें’
सध्या खाजगी बँको बऱ्यो सुविदा दितात. राज्य सहकारी बँकेन लेगीत काळा प्रमाण बदलप गरजेचें आसा. बँकेन सेवा दिवचे खातीर आधुनीक तंत्रज्ञानाचो वापर केलो जाल्यार सरकाराच्यो कांय येवजण्यो बँके वांगडा संलग्न करपाचो निश्चीत विचार करतले, अशें मुख्यमंत्री डॉ. प्रमोद सावंत हांणी सांगलें.
‘दूद उत्पादन वाडी खातीर गांव पोसको घेवचो’
देशाचे जीडीपींत सहकार मळाचो व्हड वांटो आसा. मात गोंयांत ही परिस्थिती ना. सहकार मळाक चालना दिवचे खातीर राज्य सहकारी बँकेन यत्न करपाक जाय. ते खातीर सहकारी बँकेच्या दरेका फांट्यान एक गांव पोसको घेवन थंयचे दूद वाडी खातीर यत्न करचे, अशें मंत्री सुभाष शिरोडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
