भांगरभूंय | प्रतिनिधी
दिवचल: गोंय सरकारान भलायकी मळार आधुनीक सुविधां सयत खूबशो दर्जेदार सुविधा उपलब्ध केल्यात. गांवगिऱ्या वाठारांतलीं बायलां आयजूय आपले भलायके कडेन आडनदर करतात. तांणी नेमान तपासणी करची. गंभीर दुयेंसा विशीं सादुरताय बाळगुची. दरेक पंचायत टीबी मुक्त जावची हे खातीर आमचे यत्न आसून, गांवांगांवांनी वैजकी शिबिराचें आयोजन तशेंच राज्यांतल्या सगल्या म्हालांनी, शारांनी आधुनीक वैजकी सुविधा दितात. साडेचार लाख रुपयांचें भलायकी कवच दरेक कुटुंबा खातीर उपलब्ध जालां. ह्या सगल्यांचो योग्य पद्दतीन लाव घेवन भलायके विशीं सगल्या घटकांनी सादुरताय बाळगुची अशें आवाहन मुख्यमंत्री डॉ. प्रमोद सावंत हांणी हरवळ्यां केलें.
गोवा बोर्ड ऑफ होमिओपॅथी, ग्रामपंचायत हरवळें, श्रीकामाक्षी देवी होमिऑपॅथीक मॅडिकल कॉलेज, जेसीआय सांखळी हांच्या पालवान दोळे तपासणी आनी होमिओपॅथीक मॅडिकल शिबिराचें आयोजन पंचायत सभाघरांत केल्लें.
माचयेर सरपंच गौरवी नायक, भाजप अध्यक्ष रामा नायक देमगो मळीक, अजय मळीक, ममता दिवकार, अंकिता मळीक, दिनेश काळे तशेंच डॉक्टर्स आनी कर्मचारी हाजीर आशिल्ले.
पयशे जोडपा हेतान भलायकी कडेन आडनदर करीत आशिल्ल्यान खूबशे कडेन गंभीर दुयेंसां रौद्ररूप धारण करतात. मुळाव्या पांवड्यार दुयेंसाची तपासणी केल्यार कांक्र सारकें दुयेंस शंबर टक्के बरें करप शक्य आसा. ताका लागून ‘आरोग्यमं धनसंपदा’ हो मंत्र जपून दरेकान भलायकेची योग्य जतनाय घेवची. होमिओपॅथी, अॅलोपॅथी, आयुर्वेद निसर्गोपचार अश्यो खूबशो वैजकी सुविधा सरकारान उपलब्ध केल्यात. तशेंच उपचारा खाती सरकारान भलायकी कार्डाच्या माध्यमांतल्यान सुरक्षा कवच उपलब्ध केलां. दरेक पंचायतींत जे तरेन कोयर मुक्त करपाचो संकल्प आसा तेच धरतेर दरेक पंचायत टीबी मुक्त वाठार हे विशीं जागृताय जावप गरजेचें आसा अशेंय मुख्यमंत्री डॉ. प्रमोद सावंत हांणी स्पश्ट केलें.
निमाण्या घटका मेरेन सगल्यो सुविधा, भलायकी सेवा पावोवपाचो आमचो संकल्प आसा, आनी ताचो लाव दरेकान घेवचो अशें अवाहन तांणी केलें.
सरपंच गौरवी नायक हांणी पंचायत मळार भलायकी शिबिराचें आयोजन केल्ले खातीर खोस उक्तायतना दुयेंस मुक्त आनी कोयर मुक्त पंचायतीचो संकल्प केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
