भांगरभूंय | प्रतिनिधी
स्टेट बँकेच्या संशोधन अहवालांतली म्हायतीपणजी : देशांतल्या हेर राज्यां परस गोंयकारांची येणावळ चड आसा. गोंयची दरडोई येणावळ देशाचें तुळेंत चड आसा. पयशांची बचत करपांत लेगीत गोंयकार पयले सुवातेर आसात. पयशांची बचत करपाचें प्रमाण गोंयांत सगळ्यात चड म्हणलयार 49 टक्के आसा. देशाचें प्रमाण 31 टक्के आसा. हेर राज्यां परस पयशांची बचत करपांत गोंय बरेच फुडें आसा.
स्टेट बँक ऑफ इंडियाच्या संशोधन फांट्यान म्हायती घेवन संशोधना उपरांत हो निश्कर्श जाहीर केला. तरेकवार राज्यांतले दरेकी खर्चाचें प्रमाण लेगीत संशोधना उपरांत जाहीर केला. शारी आनी गांवगिऱ्या वाठारांतलें प्रमाण वेगवेगळे आसा.
बचतीचो विचार केलो जाल्यार गोंयचें प्रमाण सगळ्यांत चड 49 टक्के आसा. गोंया उपरांत गुजरातचे बचतीचें प्रमाण 41 टक्के, हरियाणाचे 40 टक्के जाल्यार कर्नाटकाचे 39 टक्के आसा. बिहारांत बचतीचें प्रमाण सगळ्यांत उणें मायनस 6 टक्के आसा. राष्ट्रीय बचतीचें प्रमाण 31 टक्के आसा. म्हयन्याचो खर्च आनी दरडोई येणावळीचो विचार करून हें प्रमाण काडिल्ल्याचो उल्लेख अहवालांत आसा.
……………………
शारी भागात म्हयन्याचो खर्च चड
गोंयकारांचो म्हयन्याचो खर्च गांवगिऱ्या वाठारा परस शारी वाठारांत चड आसा. गांवगिऱ्या वाठारांतलो एका मनशाचो सरासरी खर्च 8,048 रुपया आसा. शारी वाठारांतलो म्हयन्याचो खर्च 9,726 रुपया आसा. शारी आनी गांवगिऱ्या वाठारांतल्या खर्चाच्या फरकाचें प्रमाण 20.8 टक्के आसा.
म्हयन्याच्या खर्चात लेगीत गोंय पयले सुवातेर आसा. राष्ट्रीय पांवड्यार गांवगिऱ्या वाठारांत म्हयन्याचो खर्च 4,122 रुपया आसा. शारी वाठारांतल्या दरेकी मनशाचो खर्च 6,996 रुपया आसा. शारी आनी गांवगिऱ्या वाठारातल्या फरकाचें प्रमाण 69.7 टक्के आसा. गोंयांत शारी आनी गांवगिऱ्या वाठारांतल्या खर्चा मदलो फरक लेगीत उणो (20.8) टक्के आसा.
……………………………
तशेंच म्हारगायेक लागून खर्च वाडत आसता. 2022 – 23 चे तुळेंत 2023 – 24 चो म्हयन्याचो दरेकल्याचो खर्च गांवगिऱ्या वाठारांत 681 रूपयांनी वाडला. शारी वाठारांत ही वाड 992 रुपया आसा. खर्चाचें प्रमाण वाडपा मदीं लेगीत गोंय पयले सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
