भांगरभूंय | प्रतिनिधी
खबरां संस्था
चट्टोग्रामः बांगलादेशान तीन मॅचींच्या वन-डे माळेंत पयले मॅचींत श्रीलंकेक 6 विकेटींनी हारयलें. बांगलादेशाचो कॅप्टन नजमुल हुसेन शांतोन नाबाद (122) शेकडो केलो आनी तो मॅन ऑफ दी मॅच थारलो. जहुर अहमद चौधरी स्टेडियमाचेर श्रीलंकेन पयलीं खेळून 255 धांवड्यो केल्यो. बांगलादेशान 45 वे ओव्हरींत 4 विकेटी वोगडान जैताचें लक्ष्य हातासलें.
टॉस जिखून पयलीं बॅटींग करपाचो श्रीलंकेचो निर्णय तांच्या आंगार आयलो. पथुम निसांक आनी अविश्का फर्नांडोन डावाची बरी सुरवात केली. 71 धांवड्यांची भागिदारी करून फर्नाडो 33 आनी निसांका 36 धांवड्यो करून आवट जाले. कॅप्टन कुसल मेंडिसान एके वटेन तिगलो तरी दुसरे वटेन समरविक्रमा (3) असलंका (18) आवट जाले आनी 128 धांवड्यांत चार विकेटी पडल्यो.मेंडीस आनी लियानागेन डाव साल्वार करतना पांचवे विकेटी खातीर 69 धांवड्यांची भागिदारी करून पंगडाक दोनशेच्या लागीं पावयलें. मेंडीस 59 धांवड्यो करून आवट जालो. 5 आवट 197 उपरांत हसरंगा (13), महीश तिक्षणा (1), प्रमोद मदुशन (8) आनी दिलशान मदुशंका (0) आवट जाले आनी डाव 255 धांवड्यांत सोपलो. बांगलादेशाच्या शोरिफूल इस्लाम, तस्कीन अहमद आनी तंजीन हसन साकिबान दरेकी 3 विकेटी घेतल्यो.
256 धांवड्याचो फाटलाव करतना बांगलादेशाची सुरवात बाबत जाली. लिट्टन दास पयल्याच बॉलार आवट जालो. सौम्य सरकार आनी तौहीद हृदॉय दरेकी तीन धांवड्यो करून आवट जाले. 3 आवट 23 उपरांत कॅप्टन नजमुल हुसैन शांतो आनी मदमूदुल्लाह पंगडाक शंबरा लागीं व्हेलें. महमूदुल्लार 37 धांवड्याचेर आवट जालो. तांणी 69 धांवड्याची भागिदारी केली. मुशफिकूर रहीमाक वांगडा घेवन शांतोन पंगडाक 6 विकेटीन जैत मेळोवन दिलें. शांतो 122 आनी रहीम 73 धांवड्यांचेर नाबार रावले. दिलशान मदुशंकान 2 आनी प्रमोद मदुशन आनी लाहिरू कुमारान दरेकी एक विकेट घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
