भांगरभूंय | प्रतिनिधी
पयले टॅस्टीच्या पयल्या दिसा भारताच्या बॉलरांनी आपलो शेक दवरलो. बॉलरांनी वॅस्ट इंडिजाक व्हड धांवसंख्या उबारपा पसून आडायलो. पयलीं बॅटींग करतना वॅस्ट इंडिजाचो पयलो डाव फकत 162 धांवड्यांचेर सोंपलो. पयल्या दिसाचो खेळ सोंप मेरेन भारतान पयल्या डावांत दोन विकेटी व्हगडावन 121 धांवड्यो केल्ल्यो. भारत अजून 41 धांवड्यांनी फाटीं आसा. लोकेश राहुल 53 आनी मुखेली शुभमन गिल 18 धांवड्यो करून खेळपट्टीचेर आसात. वॅस्ट इंडिजा वतीन जेडन सिल्स आनी रोस्टन चेस हांकां एकेक विकेट फावो जाली.
वॅस्ट इंडिजाचो डाव बेगीन सोंपल्या उपरांत यशस्वी जयस्वाल आनी राहुल हांणी भारताक बरी सुरवात करून दिली. दोगांयनी पयले विकेटी खातीर 68 धांवड्यांची भागिदारी केली. सिल्सान यशस्वीक बाद करून भारताक पयलो धपको दिलो. यशस्वीन 54 बॉलांनी सात चवक्यांचे मजतीन 36 धांवड्यो केल्यो. ते उपरांत तिसरे सुवातेर बॅटिंगेक आयिल्लो साई सुदर्शन सात धांवड्यो करून तंबंत परतलो. 90 धांवड्यांचेर भारताक दुसरो धपको बसलो. रोस्टन चेसान ताका एलबीडब्ल्यू बाद केलो.
दोन विकेटी रोखड्योच पडल्या उपरांत राहुलान गिला वांगडा मेळून डाव सांबाळ्ळो. हे मजगतीं, राहुलान आपलो अर्द शेंकडो पूर्ण केलो. गिल आनी राहुल हांणी पयल्या दिसाचो खेळ सोंप मेरेन भारताक आनीक धपको बसपाक दिलो ना. तिसरे विकेटी खातीर तांचे मदीं 31 धांवड्यांची भागिदारी जाल्या. भारताची मोख आयज व्हड आघाडी घेवपाची आसतली.
मजगतीं, पयलो दीस बॉलरांनी गाजयलो. फास्ट बॉलरांनी मेळून वॅस्ट इंडिजाच्या सात बॅट्समनांक बाद केले. स्पिनरांक तीन विकेटी फावो जाल्यो. भारतान तीन स्पिनर, दोन फास्ट बॉलर आनी एका अश्टतासाच्या खेळगड्याक सुवात दिल्या.
टॉस जिखून पयलीं बॅटींग करपाचो निर्णय घेवपी वॅस्ट इंडिजाक व्हड धांवसंख्या उबारपाक अपेस आयलें. जस्टिन ग्रिव्सान सगल्यांत चड 32 धांवड्यो केल्यो. तांचो डाव साडेपांच वरां भितर सोंपलो. मोहम्मद सिराजान चार जाल्यार जसप्रीत बुमरान तीन विकेटी घेतल्यो. कुलदीप यादव आनी वॉशिंग्टन सुंदर हांकां एकेक विकेट फावो जाली.
वॅस्ट इंडिजाच्यो 42 धांवड्यां भितर चार विकेटी पडल्यो. सिराजान तेजनारायण चंद्रपॉल (0), ब्रॅण्डन किंग (12) आनी एलिक एथनाझे (13) हांकां तंबूंत धाडले. जाल्यार बुमरान जॉन कॅम्पबेलाक (8) बाद केलो. ते उपरांत मुखेली जोस्टन चेस आनी शाई होप हांणी पांचवे विकेटी खातीर 48 धांवड्यांची भर घाली. होप हाका कुलदीप यादवान बाद केलो. ताणें 26 धांवड्यो केल्यो.
दुसऱ्या सत्रांत रोस्टन 24 धांवड्यो करून सिराजाचो बळी थारलो. ते उपरांत सुंदरान खेरी पियरे (19) हाका एलबीडब्ल्यू बाद केलो. ते उपरांत बुमरान घातक यॉर्कराचेर जस्टिन ग्रिव्स (32) आनी जोहान लेन (1) हांकां बोल्ड केले. अखेरेक, कुलदीपान वॉरिकाक (8) बाद करून विंडिजाचो डाव सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
