भांगरभूंय | प्रतिनिधी
ऑस्ट्रेलिया आनी भारतीय बायलांच्या पंगडां मदली एकोडी पिंक बॉल टॅस्ट मॅचीच्या पयल्या दिसा बॉलरांनी पुरायपणान आपलो शेक दवरलो.
वाका मैदाना वयल्या पाचवेचार खेळपट्टीचेर टॉस हारल्या उपरांत पयली बॅटींग करतना भारताचो डाव 62.4 ओव्हरींनी 198 धांवड्यांचेर सोंपलो. ते उपरांत, पयल्या दिसाचो खेळ सोंपलो त्या वेळार ऑस्ट्रेलिया पंगडान 3 विकेटी व्हगडावन 96 धांवड्यो केल्यात. अशे तरेन तो भारताचे धांवसंख्ये परस अजून 102 धांवड्यांनी फाटीं आसा.
पर्थचे जलद खेळपट्टीचेर पयल्या दिसा वट्ट 13 विकेटी पडल्यो. हातूंत पदार्पण करपी लुसी हॅमिल्टन आनी सायली सातघरे हांणी आपलो ठसो उमठयलो.
ऑस्ट्रेलिया पंगडा वतीन पयली टॅस्ट खेळपी 19 वर्सां पिरायेची फास्ट बॉलर लुसी हॅमिल्टनान भारताक खर धपको दीत दुसरेच ओव्हरींत स्मृती मंधानाक (4) बाद केली. हॅमिल्टनान 31 धांवड्यांनी 3 विकेटी घेतल्यो. हातूंत अर्द शेंकड्याची खेळी करपी जेमिमा रॉड्रिग्साचे (52) म्हत्वाचे विकेटीचो आस्पाव आसा. भारता कडल्यान जेमिमा खेरीत शेफाली वर्मान 35 धांवड्यांचें योगदान दिलें. पूण, ॲनाबेल सदरलॅण्डाचे घातक स्विंग बॉलिंगे मुखार भारताची मदली फळी गडगडली.
सदरलॅण्डान 46 धांवड्यांनी 4 विकेटी घेतल्यो. मजगतीं, ऑस्ट्रेलिया पंगडाची फिल्डी बाबत जाली. सदरलॅण्डाचे बॉलिंगेचेर चार कॅची सुटल्यो. जाका लागून भारताचो पंगड 200च्या लागसार पावपाक शकलो.
भारता वतीन चार खेळगडयांनी पदार्पण केलें. बॅटिंगेंत अपेस आयल्या उपरांत भारताच्या बॉलरांनी आपल्या पंगडाक पुनरागमन करून दिलें. पदार्पण करपी सायली सातघरेन जॉर्जिया वोल हिका एका उत्कृश्ट इन-स्विंगचेर बोल्ड करून भारताक पयलें येस मेळोवन दिलें. ते उपरांत क्रांती गौड हिणें फोबी लिचफिल्डाक बाद करून ऑस्ट्रेलियेचेर चेंपण हाडलें. आपली निमाणी टॅस्ट खेळपी ऑस्ट्रेलियेची मुखेली एलिसा हिली लेगीत 13 धांवड्यांचेर सातघरेच्या बॉलाचेर बाद जाली.
पयल्या दिसाचो खेळ सोंपलो त्या वेळार एलिस पेरी 43 आनी एनाबेल सदरलॅण्ड 23 धांवड्यांचेर खेळटाली. ह्या दोगांयचे भागिदारीक लागून ऑस्ट्रेलिया सुरवातीक बशिल्ल्या धपक्यां उपरांत स्वताक सांबाळपाक येसस्वी थारली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
