भांगरभूंय | प्रतिनिधी
ऑस्ट्रेलिया आनी दक्षीण आफ्रिका ह्या पंगडां मदीं हांगाच्या लॉर्ड्स मैदानाचेर सुरू जाल्ले संवसारीक टॅस्ट चॅम्पियनशिप फायनलीच्या पयल्या दिसा बॉलरांनी आपलो शेक दवरलो.
टॉस हारल्या उपरांत पयलीं बॅटींग करतना ऑस्ट्रेलिया पंगडान पयल्या डावांत 56.4 ओव्हरींनी 212 धांवड्यो केल्यो. ताच्या ब्यू वेबस्टरान सगल्यांत चड 72 धांवड्यो केल्यो, जाल्यार अणभवी स्टिव स्मिथान 66 धांवड्यांचें योगदान दिलें. दक्षीण आफ्रिकेचो फास्ट बॉलर कगिसो रबाडान 5 विकेटी घेतल्यो. मार्को यानसेनान 3 विकेटी मेळयल्यो.
पयल्या दिसाचें निमाणें सत्र बॉलरांनी गाजयलें. 28.4 ओव्हरींनी 65 धांवड्यो जाल्यो जाल्यार वट्ट 9 विकेटी पडल्यो. ह्या सत्रांत ऑस्ट्रेलिया पंगडान निमाण्यो 5 विकेटी 22 धांवड्यांचेर व्हगडायल्यो, जाल्यार दक्षीण आफ्रिकेन 43 धांवड्यो करतना चार विकेटी व्हगडायल्यो.
ते उपरांत धांवड्यांचो फाटलाव करपी दक्षीण आफ्रिकेन पयल्या दिसाचो खेळ सोंप मेरेन 4 विकेट व्हगडावन 43 धांवड्यो केल्ल्यो.मिचेल स्टार्कान 2, पॅट कमिन्स आनी जोश हेझलवूड हाणें एकेक विकेट मेळयली.
दक्षीण आफ्रिकेची सुरवात बरी जाली ना. पंगडाचो स्कोर शुन्याचेर आशिल्लो त्या वेळार स्टार्कान एडेन मार्करमाक तंबूंत धाडलो. ते उपरांत 19 धांवड्यांचेर दुसरो धपको बसलो. स्टार्कान आपली दुसरी विकेट घेतना रायन रिकल्टनाक बाद केलो. ताणें 16 धांवड्यो केल्यो. स धांवड्यांची भर पडटा थंय आसा दक्षीण आफ्रिकेन आपली तिसरी विकेट व्हगडायली. ह्या कमिन्सान मुल्डराक बाद केलो. ताका फकत 6 धांवड्यो करप शक्य जाल्यो. दिसाची निमाणी विकेट त्रिस्टन स्टब्साच्या रुपान पडली. ताका हेझलवुडान दोन धांवड्यांचेर बाद केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
