भांगरभूंय | प्रतिनिधी
भारत आनी बांगलादेश ह्या पंगडां मदीं कालच्यान सुरू जाल्ले दुसरे टॅस्टीच्या पयल्या दिसा उणो उजवाड आनी पावसाक लागून फकत 35 ओव्हरीचोच खेळ जालो. पयल्या दिसाचो खेळ सोंपलो त्या वेळार बांगलादेशान 3 विकेटी व्हगडावन 107 धांवड्यो केल्ल्यो.
बिरेस्तारा उटंगाराचो पावस पडिल्ल्यान मैदान वलें आशिल्ल्यान टॉसाक लेगीत उशीर जालो. रोहीत शर्मान टॉस जिखून बांगलादेशाक पयलीं बॅटींग करपाचें आमंत्रण दिलें.
भारतान पयले टॅस्टींत खेळयिल्लोच पंगड खेळयलो. कानपूरांत सध्या आशिल्ल्या वातावरणाचो फास्ट बॉलर वेवस्थीत फायदो घेवपाक शकतले अशें पंगड वेवस्थापनाक दिसलां आसुये. पूण, बांगलादेशान परिस्थिती दुसरे भशेन पळयली. आपूण टॉस जिखिल्लो जाल्यार पयलीं बॅटिंगूच करतलो अाशिल्लो अशें टॉस जाल्या उपरांत बांगलादेशाच्या मुखेल्यान सांगलें. तशेंच बांगलादेशान तीन स्पिनरांक पंगडांत सुवात दिल्या.
फास्ट बॉलर जसप्रीत बुमरान नवो बॉल दोनूय वटेन स्विंग केलो. ताणें सुरवातीक सेगीत तीन ओव्हरी मेडन घाल्यो. ओपनर शादमान इस्लाम आनी झाकीर हसन हांणी सुरवातीच्यो ओव्हरी सांबांळून खेळ्ळयो. ताका लागून जसप्रीत बुमरा आनी मोहम्मद सिराज हांकां विकेटी मेळूंक ना.
पूण, आकाश दीपान भारताक पयली विकेट मेळोवन दिली. आपले पयले ओव्हरीच्या तिसऱ्या बॉलाचेर ताणें झाकीराक बाद केलो. गलींत उबो आशिल्ल्या यशस्वी जयस्वालान ताची कॅच धरली. कांय ओव्हरी उपरांत आकाश दीपान आनीक एक विकेट घेतली. ताणें शादमानाक एलबीडब्ल्यू बाद केलो.
शांतो सकारात्मक दिश्टीकोणांतल्यान बॅटींग करतालो. मोमिनुलान लेगीत संयमान बॅटींग केली. जेवणाच्या विसवा वेळार पावसान हाजेरी लायली. ताका लागून खेळ उसरा सुरू जालो. हे मजगतीं, आर आश्विनान शान्तोक तंबूंत धाडलो. ते उपरांत उण्या उजवाडाक लागून थांबोवचो पडलो. ते उपरांत पावसान परतून आपली हाजेरी लायली आनी मैदानी अंपायरांनी पयल्या दिसाचो खेळ सोंपिल्ल्याची अधिकृत घोशणा केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
