भांगरभूंय | प्रतिनिधी
पावसान आडखळ हाडिल्ले ऑस्ट्रेलिया आनी भारत ह्या देशां मदीं हांगाच्या गाबा मैदानाचेर सुरू जाल्ले टॅस्टीच्या पयल्या दिसा फकत 13.2 ओव्हरींचो खेळ जालो. बॉलरांक फावोशी परिस्थिती आसून लेगीत भारताक एकूय विकेट घेवपाक जमली ना. ऑस्ट्रेलियेन बिनबाद
बॉर्डर-गावस्कर ट्रॉफीचे तिसरे टॅस्टींत भारतान टॉस जिखून ऑस्ट्रेलिया पंगडाक पयलीं बॅटींग करपाचें आमंत्रण दिलें.
पाचवीचार खेळपट्टी आनी दमड हवामान पळोवन भारतान टॉस जिखून पयलीं बॉलींग करपाचो निर्णय घेतिल्लो. फाटल्या सातांतल्यो स मॅची पयलीं बॉलींग करपी पंगड जिखला. पूण, भारताच्या फास्ट बॉलरांक आपले लॅंथ सोदून काडपाक वेळ लागलो. ऑस्ट्रेलियेच्या ओपनरांनी सादूरतायेन बॅटींग केली. 5.3 ओव्हरींचो खेळ जालो त्या वेळार पावसान पयले खेपे आपली हाजेरी लायली. उस्मान ख्वाजान ह्या कालावधीत 22 बॉलांनी 13 धांवड्यो केल्यो.
अर्द वराच्या ब्रेका उपरांत खेळ परतून सुरू जालो त्या वेळार बॉलरांनी बॉल मात्सो मुखार दवरलो आनी हातूंतल्यान तांकां अदीक मुव्हमॅण्ट मेळ्ळो. हर्षित राणाचे सुवातेर खेळपी आकाश दिपान बरी बॉलींग घाली.
ह्या ब्रेका उपरांत फुडल्या 7.5 ओव्हरींनी फकत णव धांवड्यो जाल्यो. त्या वेळार पावसान परतून आपली हाजेरी लायली आनी वचपाचें नांव घेवंक ना, ताका लागून अंपायरांनी थळाव्या वेळा प्रमाण 4.13 वरांचेर पयल्या दिसाचो खेळ सोंपिल्ल्याचें घोशीत केलें.
पयल्या दिसाचो जो खेळ फुकट गेला, तो फुडल्या चार दिसांनी भरून काडटले. ताका लागून भारताच्या वेळा प्रमाण खेळ सकाळीं 5.50 वरां बदला 5.20 वरांचेर सुरू जातलो. दर दिसा वट्ट 98 ओव्हरींचो खेळ जातलो. हवामान खात्यान दिल्ले शिटकावणी प्रमाण फुडले तीन दीस सेगीत पावस पडटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
