भांगरभूंय | प्रतिनिधी
बॉक्सिंग डे टॅस्टीच्या पयल्या दिसा ऑस्ट्रेलियेचो मुखेली पॅट कमिन्सान टॉस जिखून पयलीं बॅटींग करपाचो निर्णय घेतलो. त्या वेळार उस्मान ख्वाजा न्हय जाल्यार नवोदीत 19 वर्सां पिरायेच्या सॅम कॉन्स्टसान संवसारीक क्रमवारींत पयले सुवातेर आशिल्लो फास्ट बॉलर जसप्रती बुमराक तोंड दिलें.
बुमरा आडचो आपणेन पुर्ण अभ्यास केला आनी ताका तोंड दिवपा विशीं कसलोच विचार करिना अशें कॉन्स्टसान हे टॅस्टी पयलीं म्हणिल्लें.
जालें लेगीत तशेंच, बुमराची पयली ओव्हर मेडन खेळ्ळ्या उपरांत कॉन्स्टसान बुमराचे फुडले ओव्हरी सावन आपल्या भात्यांतले सगले बाण काडपाक सुरवात केली. ताणें फुडल्या दोन ओव्हरींनी बुमराक रिव्हर्स रॅम्प आनी स्कूप करपाचो यत्न केलो. कांय खेपे तो चुकलो लेगी. त्या वेळार समालोचन करप्यां सयत सगले ताचेर हांसपाक लागले. हो नवो बॅट्समन, माळेंतल्या येसस्वी बॉलरा आड हें कितें करपाक सोदता अशें तांणी म्हणलें.
पूण कॉन्स्टसान बुमराक स्कूप आनी रॅम्पांतल्यानच न्हय तर थेट बॅटान खेळून ताचे आड चार चवक आनी दोन सक्यां सयत 33 बॉलांनी 34 धांवड्यो केल्यो. 2021 उपरांत टॅस्टींत बुमरा आड मारिल्लो हो पयलो सको आशिल्लो. जोस बटलरा उपरांत बुमरा आड एका परस अदीक सके मारपी तो फकत दुसरो बॅट्समन थारलो.
कॉन्स्टसान बुमराहाकच न्हय तर हेर बॉलरांची बॉलींग फोडून काडली. ताणें 51 बॉलांनी आपलो अर्दशतक पुर्ण केलो आनी पदार्पणाचे मॅचींत ऑस्ट्रेलिये वतीन केल्लो हो तिसरो जलद अर्द शेंकडो थारलो. पूण, पदार्पणाचे मॅचींत शेंकड्या वटेन पावला मारपी कॉन्स्टसाक (60) रवींद्र जडेजान बाद केलो. आर्म बॉल थेट ताच्या पॅडाक आपटलो आनी तो एलबीडब्ल्यू बाद जालो.
जेवणाच्या विसवा मेरेन ऑस्ट्रेलिया पंगडान फकत एकूच विकेट व्हगडायिल्ली. जेवणाच्या विसवा उपरांत दुसरो ओपनर उस्मान ख्वाजान लेगीत आपलो अर्द शेंकडो पुर्ण केलो. पूण, ते उपरांत तो रोखडोच बाद जालो. बुमरान हे माळेंत ताका पांवचे खेपे बाद केलो. ते उपरांत मार्नस लाबशेन आनी स्टीव स्मिथ हांणी डाव सांबाळपाक सुरवात केली. तांणी तिसरे विकेटी खातीर 127 बॉलांनी 83 धांवड्यांची भागिदारी केली. दोगांयनी आपलेआपले अर्द शेंकडे पुर्ण केले. अशे तरेन ऑस्ट्रेलियेच्या पयल्या चार बॅट्समनांनी अर्द शेंकडे नोंदयले.
निमाण्या सत्रांत फॉर्मांत आशिल्ल्या ट्रेव्हिस हेडाक बुमरान शुन्याचेर बाद केलो. जाल्यार मिचेल मार्शाक वैयक्तीक चार धांवड्यांचेर बुमरान तंबूंत धाडून भारताक मॅचींत हाडपाचो यत्न केलो. पूण, स्मिथान एक बाजू सांबाळून धरल्या. तो 68 धांवड्यांचेर खेळटा. दुसरे वटेन कमिन्स 8 धांवड्यो करून उबो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
