भांगरभूंय | प्रतिनिधी
नवी दिल्ली, खबरां संस्था ः लोकसभा वेंचणुकेच्या पयल्या टप्प्यांत 102 मतदारसंघांतल्यान 42 मतदारसंघांनी तीन वा चड उमेदवारांचेर गुन्यांवकारी गुन्यांव नोंद जाल्यात. 1,618 उमेदवारांतल्यान 252 उमेदवारांचीं नांवां गुन्यांवकारी प्रकरणांनी आसात. ही म्हायती ‘असोसिएशन फॉर डेमोक्रेटिक रिफॉर्म’ (एडीआर) हे संस्थेन दिली.
19 एप्रीलाक वेंचणुकेच्या पयल्या टप्प्यांत मतदान जातलें. 1,625 उमेदवारांतल्या 1,618 उमेदवारांच्या प्रतिज्ञापत्रांचें विश्लेशण केलें. 1,618 उमेदवारांतल्यान 16 टक्के म्हळ्यार 252 उमेदवारांची नांवा गुन्यांवकारी प्रकरणांनी आसात. जाल्यार 10 टक्के म्हळ्यार 161 उमेदवारांचेर गंभीर गुन्यांवकारी आरोप आसात. तशेंच 7 उमेदवारांचेर खून करपाचे गुन्यांव नोंद आसात, जाल्यार 19 उमेदवारांचेर खून करपाचो यत्न केल्ल्याचे गुन्यांव नोंद आसात.
18 उमेदवारांनी आपल्या प्रतिज्ञापत्रांत बायलां आड गुन्यांवा संबंदीत प्रकरणा जाहीर केल्यात आनी तातूंतल्या एका उमेदवाराचेर भारतीय दंड संहितेच्या कलम 376 खाला बलात्काराचो आरोप आसा. 35 उमेदवार द्वेश भाशण प्रकरणां कडेन जोडल्यात. 102 सुवाती मदीं 42 ‘रेड अलर्ट’ मतदारसंघ आसात. ‘रेड अलर्ट’ मतदारसंघ म्हळ्यार जंय तीन वा चड उमेदवारांनी आपल्या प्रतिज्ञापत्रांत गुन्यांवकारी प्रकरणा जाहीर केल्यात.
विशेश म्हणल्यार कितलोय गंभीर गुन्यांव आसलो तरी बरेच उमेदवार हाचे पयलीं जिखून आयल्यात. कांय तर भोवमतान.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
