भांगरभूंय | प्रतिनिधी
पणजीः अंदूंच्या पर्यटन हंगामाचें पयलें चार्टर विमान रशिया सावन मनोहर अंतरराष्ट्रीय विमानतळ मोपा हांगां देवलें. ह्या विमानातल्यान १२० प्रवाश्यांचें गोंयांत आगमन जालें. ह्या प्रवाशांक गोंय सरकारान उर्बेभरीत येवकार दिलो. फाल्यां आनीक एक रशिया सावन चार्टड गोंया देवपाचें आसा.
नोवोसिर्बिक्स रशिया सावन हें चार्टड विमान मोपा विमानतळाचेर बिरेस्तारा रातीं १.४० वरांचेर पावलें. ह्या विमानांतल्या प्रवाशांक पर्यटन खात्याचे संचालक केदार नर्यक, उप संचालक जयेश काणकोणकार, सहाय्यक पर्यटन अधिकारी चित्रा वेंगुर्लेकार आनी हेर पर्यटक भागधारकांनी येवकार दिलो.
ह्या पर्यटकां खातीर विमानतळाचेर गोंयचे आदारातिथ्य आनी सांस्कृतीक कलेचो आस्पाव आशिल्लो खाशेलो येवकार सुवाळो घडोवन हाडलो. हातूंत समयी नृत्य, घोडमोडणी, धनगर नाच आनी ब्रास बेण्डचें सादरीकरण करून प्रवाशांक फुलांनी येवकार दिलो.
हे विशीं उलयतना पर्यटन मंत्री रोहन खंवटे हांणी सांगलें, उर्बेभरीत नव्या पर्यटन हंगामांत आमी प्रवेश करता आसातांना गोंय हें पर्यटकांक उक्ते मनान येवकार दिवपाक सज्ज जालां.
पयलें चार्टड विमानाचें आगमन हें गोंय आवडते संसारीक थळ म्हूण नामनेची पुनरावृत्ती करता. वाडीव सुरक्षा, सुविधा आनी मन भुलोवपी अणभव सयत राज्यांत भेट दिवपी दर पर्यटकांक गोंयचे आदारातीथ्याची उर्बा अणभवपाक मेळचो हें सुनिश्चीत करपा खातीर आमी कटीबध्द आसात, अशें खंवटे हांणी सांगलें.
ह्या हंगामातलें दुसरें चार्टड परत नोवोसिर्बिक्स रशियांतल्यान फाल्यां ३ ओक्टोबराक सकाळीं ६ वरांचेर मोपा विमानतळाचेर देंवन ह्या विमानातल्यान सुमार १५० पर्यटक येवपाची अपेक्षा आसा. जाल्यार ४ ऑक्टोबराक येकातेरीनबर्ग रशिया सावन १५८ प्रवासी क्षमतेचें चार्टड विमान मोपा विमानतळाचेर सकाळीं ६.०५ वरांचेर देवतलें. जाल्यार ५ ऑक्टोबराक २९६ प्रवासी क्षमतेचें व्हडलें चार्टड विमान मोस्को रशिया सावन सकाळीं ९ वरांचेर मोपा विमानतळाचेर देवतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
