भांगरभूंय | प्रतिनिधी
वाळपयः बिरेस्तारा दनपारां पडल्ल्या उटंगाराच्या पावसान वाळपय शारांतली जनजीण विस्कळीत केली. सुमार देड वर पडल्ल्या ह्या पावसाक लागून शारांत सगळे कडेन उदक जालें आनी रस्ते उदका खाला गेले. पयल्याच पावसांत ही स्थिती जाल्यार फुडें कितें जातलें अशें लोक एकमेकांक विचारतना दिसताले. फाटल्या 24 वरांत वाळपय वाठारांत 2 इंच पावसाची नोंद जाल्या.
बिपरजॉय चक्रीवादळाक लागून पावसाचें आगमन फुडें गेल्लें. मात बिरेस्तारा दनपारां दोन वरांच्या सुमाराक अकस्मात पावस पडपाक सुरवात जाली. शारांत कामा खातीर आयिल्ल्या लोकांची धांदळ जाली. पावसाच्या उदकान वाळपय शारांत हुंवार आयिल्ल्या सारकी स्थिती जाली. वाळपय पालिका इमारती सामकारच्या रस्त्या वयल्यान उदक व्हांवपाक लागले. वाहनां सारकीं चलोवपाक मेळना जालीं. पालिकेच्या कर्मचाऱ्यांनी गटाराचे चेंबर उक्ते करून उदकाक वाट करून दिली. उदक व्हांवन वचपा कडेन चिखोल जाल्ल्यान तें तुंबलें.
वाळपय शरांतली गटरां नितळ केलीं नात. ताका लागून पावसाचें उदक व्हावन वचपाक आडमेळे आयले. अंदूच्या पावसात उदक व्हांवून वचापी जाय ती उपाय येजवण करतले अशें पालिका मंडळान सांगल्ले. मात पयल्याच पावसांत जाल्ली परिस्थिती पळोवन पावसा पयलीचीं कामां करपा कडेन पालिका मंडळाची आडनदर जाल्या हें दिसून आयलें.
वाळपय सरकारी सामाजीक हॉस्पिटला कडेन लेगीत उदक रस्त्या वयल्यान व्हांवपाक लागलें. हॉस्पिटलाच्या दारा कडेन सुमार अर्दवर उदक तूंबून आशिल्लें. लोकांनी दिल्ले म्हायती प्रमाण सत्तरी तालुक्यांतल्या हेर वाठारांत लेगीत नेटाचो पावस पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
