भांगरभूंय | प्रतिनिधी
माथ्यार वताचो रखरख, आंगार एके धारेन व्हांवपी त्यो हुमेच्यो पावळ्यो. अश्या ह्या गिमान मन पुरायपणान अस्वस्थ करून उडयिल्लें. घरांत भितर रावल्यार मन आनी शरीर दोनूय गरमेन उबगतालीं जाल्यार भायर सरल्यार सुर्यान जशीं म्हजी धवीं कात काळी करपाचीच थारायलां अशें दिसतालें. झाडां- पेडां तर आवयन तापयतकच भुरगीं वग्गी उबीं रावन आयकतात त्याच परी हेवटेन- तेवटेन हालनासतना आपल्या जाग्यार उबी आसलीं. थंड उदकाचो घोंट ताळ्या सकयल पावता तितलोच वेळ जिवाक सूऽऽ जावप, उपरांत मात तेंच उदक कपला वेल्यान एके रांगेंत देवतना दिसतालें.
हे गर्मेन म्हजी शारिरीक आनी मानसीक अवतिकाय पुरायपणीन हालोवन उडयिल्लीं. वाचन, चिंतन आनी लेखन ह्या तिनूय गजालींचेर म्हजे वटेच्यान पूर्णविराम लागिल्लो. तापिल्ले तकलेंत तापिल्लेंच विचार शिजपाक लागिल्लें. अश्या ह्या विचारांचो विचार सोडून तकली उसळूंक लागिल्ल्याचें निमित्त करून हांव बद्द बेडरुमांत आयलें आनी जनेल उगडून खाटीर आड पडलें. हे इतले गर्मेंत केन्ना दोळो लागलो तो कळूंकच ना.
अचकीत कांय खिणां उपरांत निराशेचें किर्ण वचून आशेच्या वाऱ्यान म्हज्या न्हिदिल्ल्या मुखामळार झोपय घेतलीं. म्हज्या दोळ्यांच्यो पाकळ्यो अचकीत उकतावल्यो आनी गुप्प भरिल्ल्या त्या काळ्या कुपांची सया म्हज्या दोळ्यांत भरसली. जनेलार बशिल्लें तें माणकुलें शेंवणें आपल्या म्होंवाळ आवाजान म्हाका कितें तरी सांगपाचो यत्न करतालें. माडाचीं तीं चुड्टां हे वटेंतल्यान ते वटेन धांवतालीं. पळयतां पळयतां धवो फुल्ल उजवाड केन्ना काळेकिट्ट काळखांत बदल्लो तो म्हाका समजलोच ना. मनशान तयार केल्ली लायट वता म्हणसर निसर्गान आपली लायट पेटयली. गिरणीर तांदूळ दळटात तसो घडाम- घुडूम आवाज आयकूपाक येवंक लागलो. अशें दिस जशें कोण तरी आड्डून-आड्डून आपली खोस परगटायता.
वाऱ्याची ती व्हांवती धारा अणभवपाच्या निमतान हांवें म्हजो हात ल्हवूच जनेलांतल्यान भायर घालो. त्याच खिणाक उदकाचो एक थेंब हातार पडलो. पळयता पळयता त्या अमृताच्या थेंब्यांनी पुराय धर्तरी चिप्प भिजली. नवें व्हकलेक येवकार दिल्लेवरी तीं झाडां-पेडा, तो वारो, ती माती, तीं सवणीं ह्या पयल्या पावसाक येवकार दितालीं. बेबकां खुशालभरीत जावन नाचिल्ल्याचो आवाज म्हज्या कानार पडटालो. मातयेचो तो परमळ आनी निसर्गाची ती उठून दिसपी सोबीतकाय म्हाका आपले कडेन आकर्शित करताली. ह्या खिणाक त्या सोबीत दृश्यांत मेळपी तीं खुशालकाय हांव सुखाच्या सुतांत गुंथत आसलें. अशे तरेन ह्या पयल्या पावसाची याद म्हूण गुंथिल्लो तो हार म्हजे यादींत हांवेन सुगूर करून दवरलो.
काजल नाईक
7767025071
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
