भांगरभूंय | प्रतिनिधी
नागपूर टॅस्टीच्या पयल्याच दिसा भारताच्या स्पिनरांनी ऑस्ट्रेलियेचो डाव गडगडावन उगडयलो. भारतान ऑस्ट्रेलियेचो पयलो डाव फकत 177चेर सोंपयलो.
भारता वतीन पुनरागमन करपी रवींद्र जडेजान (5-47) धांवड्यांचेर अर्दो पंगड तंबूंत धाडलो. जाल्यार आर आश्विनान तीन विकेटी घेवन ताका बरी साथ दिली. मोहम्मद सिराज आनी मोहम्मद शमी हांणी दरेकी एक विकेट घेतली.
ऑस्ट्रेलिये वतीन मार्नस लाबशेनान सगल्यांत चड 49 धांवड्यो केल्यो. स्टिवन स्मिथान 37, एलेक्स कॅरीन 36 आनी पिटर हॅण्ड्सकॉम्बान 31 धांवड्यांचें योगदान दिलें.
ते उपरांत मुखेली रोहित शर्माच्या आक्रमक अर्द शेंकड्याचे खेळीच्या नेटार भारतान पयल्या दिसाचो खेळ सोंप मेरेन एक विकेट वगडावन 77 धांवड्यो केल्यात. पयल्या दिसाचो खेळ सोंपलो त्या वेळार रोहित शर्मा 56 धांवड्यांचेर आनी नायट वॉचमॅन आर आश्विन शुन्याचेर खेळटालो. लोकेश राहुल 20 धांवड्यो करून बाद जालो. भारत पयल्या डावांत अजून 100 धांवड्यांनी फाटीं आसा.
रोहित शर्मान डावाची सुरवात आक्रमक खेळान केली. ताणें पयले ओव्हरींत तीन चवके मारले. नॅथन लियॉनाक मुखार येवन टॅस्टींतलो आपलो 250 सको पुर्ण केलो. रोहित आनी राहुल हांणी 23 ओव्हरी खेळून काडटना 76 धांवड्यांची भागिदारी केली. पयल्या दिसाचो खेळ सोंपपाक आठ बॉल बाकी आसतना ऑस्ट्रेलियेक पयलें येस मेळ्ळें. पदार्पणाची मॅच खेळपी टॉड मर्फीन स्वताचेर बॉलिंगेचेर लोकेशाची कॅच धरली.
ते पयलीं टॉस जिखून पयलीं बॅटींग करपाचो निर्णय घेवपी ऑस्ट्रेलियेची सुरवात बाबत जाली. दोन धांवड्यांच्या स्कोराचेर दोगूय ओपनर तंबूंत परतून गेल्ले. ते उपरांत स्टीव आनी लाबशेन हांणी 82 धांवड्यांची भागिदारी करून पंगडाचो ताबो घेतलो. पूण, जडेजान एके ओव्हरींत दोन विकेटी घेवन ऑस्ट्रेलियेक बॅकफुटाचेर धुकल्लो. ते उपरात ताणें स्मिथाक बाद केलो. पिटर हॅण्ड्सकॉम्ब आनी एलेक्स कॅरी हांणी लेगीत अर्दशेंकड्याची भागिदारी केली. अखेरेक आश्विनान ही जोडी फोडली. ते उपरांत जडेजा वांगडा मेळून ऑस्ट्रेलियेचो डाव सोंपयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
