भांगरभूंय | प्रतिनिधी
येजमान आनी दक्षीण आफ्रिका ह्या पंगडां मदीं कालच्यान तीन टॅस्ट माळेंतली पयली मॅच ब्रिस्बनांत सुरू जाली. पयलो दीस बॉलरांनी गाजयलो. पयल्या दिसा वट्ट 15 विकेटी पडल्यो.
ऑस्ट्रेलियेन टॉस जिखून पयलीं बॉलींग करपाचो निर्णय घेतलो आनी दक्षीण आफ्रिकेचो पयलो डाव 152चेर सोंपयलो. कायल वेरेन्नेन सगल्यांत चड 64 धांवड्यो केल्यो. मिचेल स्टार्क आनी नॅथन लायन हांणी दरेकी तीन विकेटी घेतल्यो. पॅट कमिन्स आनी स्कॉट बोलॅण्ड हांकां दरेकी दोन विकेटी फावो जाल्यो.
प्रत्तुत्तर दिवपी ऑस्ट्रेलिया लेगीत संघर्श करतना दिश्टी पडटा. पयल्या दिसाचो खेळ सोंपलो त्या वेळार ऑस्ट्रेलियान 5 विकेटी वगडावन 145 धांवड्यो केल्यात. ट्रॅवीस हेड 78 धांवड्यो करून खेळपट्टीचेर आसा. स्टिवन स्मिथान 36 धांवड्यो केल्यो. आफ्रिके वतीन कगिसो रबाडा आनी एन्रिक नोर्त्या हाणें दरेकी दोन विकेटी घेतल्यो.
ऑस्ट्रेलियेची सुरवात सामकी बाबत जाली. पयल्याच बॉलाचेर रबाडान ऑस्ट्रेलियेक पयलो धपको दिलो. ताणें डॅव्हीड वॉर्नराक शुन्याचेर तंबूंत धाडलो. ऑस्ट्रेलियेक दुसरो धपको मार्नस लाबशेनाच्या रुपान बसलो. णववे ओव्हरीच्या पयल्या बॉलाचेर मार्को जॉन्सेनान ताका तंबूंत धाडलो.
ऑस्ट्रेलियेक तिसरो धपको लेगीत रोखडोच बसलो. उस्मान ख्वाजा 27 धांवड्यो करून बाद जालो. ते उपरांत स्मिथान हेडा वांगडा मेळून डाव सांबाळपाचो यत्न केलो. स्मिथ 68 बॉलांनी 36 धांवड्यो केल्यो. त्या वेळार ऑस्ट्रेलियेचो स्कोर 144 जाल्लो. स्मिथा उपरांत हेड एक धांवडेचे फरकान बाद जालो. ताणें 78 बॉलांनी 77 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
