भांगरभूंय | प्रतिनिधी
भावंडांनो,
स्वतंत्र भारत देशाचे पयले राष्ट्रपती म्हणून जाणी पदभार सांबाळ्ळो ते म्हान फुडारी म्हळ्यार डॉ. राजेंद्र प्रसाद. तांची जयंती 3 डिसेंबराक. तांकां नमळायेन वंदन करून तुमचे खातीर तांचे विशींची थोडी म्हायती दितां.
भावंडांनो, राजेंद्र प्रसादांचो जल्म 3 डिसेंबर 1884 दिसा बिहारांतल्या जिरदोई गांवांत जाल्लो. बापूय म्हादेव जाल्यार आवय जाल्यार आवय कमलेश्वरी देवी. पांच वर्साचे पिरायेचेरच तांणी मौलवी सायबा कडल्यान फारशींचें शिक्षण घेवपाक सुरवात केली.
भावंडांनो, राजेंद्र प्रसादाचे शाळेंतली एक गजाल वाचनांत आयिल्ली याद जाता. तेन्ना राजेंद्र प्रसादांचे व्हडले भाव महेंद्र प्रसाद म्हळ्यारच भाईजी छापरांतल्या जिल्हो शाळेंत शिकताले. ते इंग्लीश शिकप घेवन आयिल्ल्यान राजेंद्र प्रसादाक तांच्या मार्गदर्शना खाला इंग्लीश शिकूंक मेळ्ळें. तशे राजेंद्र प्रसाद मुळांतच हुशार. तांणी पयल्याच वर्सा आठवेंत पयलो नंबर मेळयलो. तें पळोवन शाळेचे कडक आनी शिस्तीचे मुख्याध्यापक शरदचंद्रराय चौधरी हाणी राजेंद्र प्रसादाक, तांची हुशारी पळोवन आठवेंतल्यान सातवेक घाली नासतना सवेच्या वर्गांत घालें. त्या वेळार उरफाट्या क्रमान यत्ता मेजताले. ते बडटीचे निर्णयान महेंद्र प्रसाद तशेंच हेरांचेर मानसीक चेंपण आयलें. राजेंद्र प्रसादाक वाडट्या अभ्यासाचें वजें पेलचें ना म्हूण सगळेच भिले. पूण राजेंद्र प्रसादांनी मुख्याध्यापकाचें उतर, कृती सार्थकी लायली. सवे यत्तेंतय ते पयले आयले. भावंडांनो, ही देख घेवपा सारकी गजाल आसा. हे घडणुकेंतल्यान आमकां तांची असामान्य बुध्दिमत्ता, जीद्द आनी नमळाय दिसता.
मॅट्रिकेचे परिक्षेंत पयलो नंबर मेळटकच तांणी कोलकोत्याचे प्रेसिडेंन्सी कॉलेजींत बी.ए. तशेंच एम्. ए. पयल्याच नंबरांत पास जावन पुराय केली. उपरांत कायद्याची सर्वोच्च पदवीय ताणी पयलो नंबर मेळोवन केली.
विद्यार्थी दशेंत तांणी राजकी जागृताय घडोवन हाडटना बिहार छात्र परिशद संस्था स्थापना केली. 1911 वर्सा ताणी पाटण्यांत उच्च न्यायालयांत वकिली करपाक सुरवात केली. त्याच वर्सा ते कॉंग्रेसीचे वांगडी जाले. स्वदेशी आनी लोकसेवा ही दोन व्रतां तांणी आपणायली. त्या वेळार तांचो चंपारण्यांतल्या सत्याग्रहां वावुरतना गांधीजी कडेन संपर्क आयलो. 1918 वर्सा तांणी शेतकारांच्या सारा बंदी चळवळींत वांटो घेतलो. जालियानवाला बाग हत्याकांडा उपरांत तांणी वकिली सोडली आनी देशसेवे खातीर तळमळीन वावुरपाक लागले. खादी ग्रामोद्योग, अस्पृश्यताय निवारण, राष्ट्रीय शिक्षण आनी राजभाशेचो प्रसार करपांत ते वांटेकार जाले.
भावंडांनो, 1921 वर्सा राजेंद्र बाबूनीं बिहार विद्यापीठ आनी सदाकत आश्रमाची स्थापणूक केली. 1935 वर्सा मजगती ते कॉग्रेसीचे आनी कॉंग्रेस अधिवेशनाचे अध्यक्ष म्हणून वावुरले.
भावंडांनो, आपल्या आई कडल्यान मेळयल्ले वरे संस्कार, सादी जीण, उंचेले विचार, बरें आचरण आनी भेदा विरयत मनीसपण ह्या गुणांनी राजेंद्र प्रसाद इतिहासांत अमर उरले. ते 28 फेब्रुवारी 1963 दिसा ह्या संवसाराक अंतरले. अश्या ह्या म्हान फुडाऱ्याक आमी 3 डिसेंबराक तांच्या जयंती निमतान तांचो उगडास काडुया आनी सगळीं जाणां तांकां श्रद्धांजली ओंपुया हां? बरें तर..
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
