भांगरभूंय | प्रतिनिधी
नवी दिल्ली, खबरां संस्था: लश्करांतलीं उत्पादनां ‘मेड इन इंडिया’ करपाचें धोरण मोदी सरकारान आखलें. हाका लागून खाजगी कंपनींय आतां लश्करांतलीं उत्पादनां विकसीत करपाक लागल्यांत. देशांतलो सगळ्यांत विस्वासू ब्रँड म्हणून वळख आशिल्लो टाटा ग्रुप हवाई दळा खातीर विमानां करतलो. प्रधानमंत्री नरेंद्र मोदी आनी स्पेनचे प्रधानमंत्री पेड्रो सांचेज हांणी टाटा एअरक्रॉप्ट कॉम्प्लेक्साचें उक्तावण केलें. ह्या कॉम्प्लेक्सांत सी- 295 ट्रान्सपोर्ट एअरक्राफ्ट तयार करतले. भारत आनी स्पेना मजगतीं ५६ विमानां करपाची कबलात जाल्या. तांतलीं १६ विमानां स्पेनांत तयार जातलीं. उपरांत ४० विमानां टाटा एडवान्स सिस्टम्स लिमिटेड गुजरातांतल्या वडोदरांत जातलीं.
सी-295 ची गरज कित्याक?
टाटा एडवान्स सिस्टम्स लिमिटेड विमान करपी देणांतली पयली खाजगी कंपनी थारल्या. सी-२९५ ट्रान्सपोर्ट एअरक्राफ्टची गरज भारतीय हवाई दळाक आशिल्ली. ताचे वरवीं सैनीक, शस्त्रास्त्रे, इंधन एकाच ठिकाणा वेल्यान दुसरे कडेन व्हरपाक मेळटलें. सी २९५ उण्या वजनाच्या सामानाची येरादारी करतलें.
अश्यो आसात सुविधा
सी-२९५ विमानांनी दोन मनीस उड्डाण करपाक शकतात. तातूंत ७३ सैनीक वा ४८ पॅराट्रूपर्स बसपाक शकतात. तशेंच १२ स्ट्रेचर इंटेसिव्ह केयर मेडवॅक वा २७ स्ट्रेचर मेडवॅक वांगडा ४ मेडिकल अटेंडेंट प्रवास करपाक शकतात. हे एअरक्रॉप्ट चडांत चड ९२५० कील वजन घेवन वचपाक शकता. ताची लांबाय ८०.३ फूट, विंगस्पॅन ८४.८ फूट आनी उंचाय २८.५ फूट आसा. ह्या एअरक्राफ्टांत ७६५० लिटर इंधन येता. ४८२ किलोमिटर/वेगान उडपाक शकता. ताची रेंज १२७७ ते ४५८७ किमी आसा. तातूंत कितलें वजन आसा, ताचेर रेंज थारतली. चडांत चड १३,५३३ फूट उंच तें वचपाक शकता.
ल्हान रनवे वेल्यान उड्डाण
सी-२९५ विमान ८४४ मीटर ते ९३४ मीटर लांबीच्या रनवेवेल्यान उड्डाण करपाक शकता. ताका देंवपाक फकत ४२० मिटरांचो रनवे पुरो. तातूंत स हार्ड पॉयंट्स आसात. म्हळ्यार शस्त्रां आनी संरक्षण यंत्रणां बसोवपाचो जागो आसा. दोनूय फॅनां खाला दरेकी तीन वा इनबोर्ड पायलॉन्स आसपाक शकतात. जातूंत ८०० किलो वजनाची शस्त्रां बसोवपाक मेळटलीं. टाटान फाटल्या वर्सा नोव्हेंबर सावन ४० विमानां खातीर मेटल कटिंगाचें काम सुरू केलां. हैदराबाद सध्या ताचें मुखेल काम सुरु आसा. खुबशे भाग हांगा साठयतात. टाटाचें हैदराबाद केंद्र विमानांचे मुखेल भाग तयार करतले. उपरांत ताका वडोदरा हांगा व्हरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
