भांगरभूंय | प्रतिनिधी
इंडीयन प्रिमीयर लिगेंत (आयपीएल) आयज गुणतकट्यांत पयले सुवातेर आशिल्लो कोलकाता नायट रायडर्स पंगड लिगेंतल्यान भायर पडिल्ल्या मुंबय इंडियन्सा आड खेळटलो.
दोनूय पंगडां मदीं अजून मेरेन 33 मॅची जाल्यात, हातूंतल्यो मुंबय इंडियन्सान 23 जिखल्यात, जाल्यार कोलकातान 10 मॅचींनी जैत जोडलां. कोलकाताचें घरगुती मैदान ईडन गार्डन्सांत ह्या पंगडां मदीं 10 मॅची जाल्यात. हातूंतल्यो सात मॅची कोलकातान जिखल्यात, जाल्यार मुंबयक फकत तीन मॅची जिखपाक येस आयलां.
अंदूंच्या हंगामांतल्या पयल्या टप्प्यांत ह्या पंगडां मदीं जाल्ली मॅच कोलकातान 24 धांवड्यांनी जिखिल्ली.
मुंबय इंडियन्साचो ओपनर रोहीत शर्मान चेन्नय सुपरकिंग्सा आड शेंकडो मारल्या उपरांत फाटल्या स डावांनी 36,6,8,4,11,4 अशो धांवड्यो केल्यात. आयचे मॅची वरवीं फॉर्मांत येवपा विशीं ताचो दुबाव आसा. हाचें फाटलें मुखेल कारण म्हणल्यार सुनील नरेनान टी-20 क्रिकेटींत ताका 10 खेपे बाद केला. दुसरे वटेन रोहीतान ताच्या आड फकत 18.7चे सरासरीन आनी 108चे स्ट्रायक रेटीन धांवड्यो केल्यात. पूण, आंद्रे रसेल आनी मिचेल स्टार्क हांच्या आड रोहीताची स्ट्रायक रेट उत्कृश्ट आसा. ताणें रसेला आड 165.5 आनी स्टार्का आड 150चे स्ट्रायक रेटीन धांवड्यो केल्यात.
सुनील आनी रसेल हे कॅरिबियनाचे जोडयेन अंदूंच्या हंगामांत कोलकाता खातीर उत्कृश्ट प्रदर्शन केलां. पूण, मुंबय इंडियन्साचो मुखेल बॉलर जसप्रीत बुमरा आड ते दोगूय धडपडटना दिसतात. सुनीलान बुमरा आड 38.5चे स्ट्रायक रेटीन आनी पांचाचे सरासरीन धांवड्यो केल्यात. बुमरान रसेलाक तीन खेपे बाद केला. जाल्यार रसेलान ताच्या आड फकत 129.4चे स्ट्रायक रेटीन धांवड्यो केल्यात.
आयपीएलाच्या अंदूंच्या हंगामांत अजून मेरेन 1038 सके मारल्यात. आयचे मॅचींत हातूंत आनीक भर पडुये. 2022त इडन गार्डन्सांत डॅथ ओव्हरींनी (16-20) सुमार 8.2 बॉलांनी सको आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
