भांगरभूंय | प्रतिनिधी
मडगांव: मडगांव शारांतल्या कोंब वाठारांत एके एकटेच रावपी बायलेचे जिवघेणो हल्लो जालो. तिका च्या करपाक लावन लुटमार केल्ल्याची घडणूक मुखार आयली. ह्या प्रकरणाची खराय वळखून मडगांव पुलिसांनी वेगान तपास करून दुबावीत चोराक सामाना सयत ताब्यांत घेतलो.
मेळिल्ले चड म्हायती प्रमाण, कोंबा रावपी कोनी पाशेको ही आपल्या घरांत एकटीच आसता. रातच्या सुमार देड ते दोन वरां सुमाराक एका चोरान घरांत प्रवेश केलो. हो चोर हिंदी उलयतालो. दुबावितान पाशेको हांकां सुरयेचो भंय दाखोवन बरोच मार घालो. हातूंत ती जखमी जाली. ‘तुकां आपणें इतली मारल्या, आनीक अर्द वरान तुकां मरण येतलें’, असो भंय घालून चोरान पिडेस्त बायलेक च्या करपाक लायली. सामकी भियेल्ले अवस्थेंत आशिल्ले पाशेको हांणी त्या चोराक च्या करून दिली. च्या पिवन जाले उपरांत चोरान घरांतलो मोबायल आनी लॅपटॉप चोरून थंयच्यान पळ काडलो.
उपरांत पाशेको हांणी पुराय बळगें एकठांय करून घरांतलें मदलें दार लावन घेतलें आनी फाटल्या दारांतल्यान शेजार्यांगेर धांव मारली. शेजार्यांनी तिका रोखडीच हॉस्पिटलांत दाखल केली.
ह्या प्रकरणाची मडगांव पुलिसांक म्हायती मेळटांच तांणी चोराक सोदपाक सुरवात केली. मडगांवचे पुलीस निरीक्षक सुरज सामंत हांणी दिल्ले म्हायती प्रमाण, पोरण्या रेल्वे स्टेशना लागसार रस्त्यार चोरयेचो मोबायल आनी लॅपटॉप विकपाचे तयारेंत आशिल्ल्या एका दुबाविताक पुलिसांनी सांपळो रचून ताब्यांत घेतलो. सध्या ह्या दुबाविताची पुलीस चवकशी करतात. हे घडणुकेन मडगांव वाठारांत व्हड बोवाळ जाला. एकटीच रावपी बायलांचे सुरक्षेचो प्रस्न हे घडणुकेक लागून परत मुखार आयला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
