भांगरभूंय | प्रतिनिधी
मोसमांतली पयली बोट, 2078 प्रवाशी आयले
भांगरभूंय । प्रतिनिधी
पणजी : पर्यटन हंगामाची पयली क्रूझ बोट सोमारा मुरगांव बंदरार पावली. एमव्ही ‘सेलिब्रिटी मिलेनियम’ हे बोटींतल्यान अमेरिका, यूके, जर्मनी आनी भारतांतल्यान 2078 विदेशी आनी देशी पर्यटक गोंयांत पावले. फुडले दोन दीस ही बोट आपलो राबितो गोंयांत करतली.
हे बोटीन सिंगापूर देशांतल्यान प्रवास सुरू करून कोचीनांत एक स्टॉप घेवन सोमारा सकाळीं गोंया पावली. 27 नोव्हेंबराक ही बोट आपलो प्रवास परतून सुरू करून ती मुंबयचे दिशेन वतली.
हे बोटींतल्या 2,078 पर्यटकांक आनी 977 क्रू वांगड्यांक गोंय सरकारा वतीन गोंयचे परंपरीक पद्दतीन ब्रास बॅण्ड आनी ग्रॅण्ड रिसेप्शन दिवन गोंयांत येवकार दिलो. इतले व्हड संख्येन येवपी पर्यटक बंदराची व्हड प्रमाणांत क्रूझ हातळणेचो तांकीचे तयारीची गवाय दिता.
‘सेलिब्रिटी मिलेनियम’ गोंय क्रूझ हंगामाची घटमूट सुरवात आनी मुरगांव बंदर हे अंतरराष्ट्रीय क्रूझ टुरिझमा खातीरचो हब म्हूण म्हत्व दाखोवन दिता. फुडाराक येवपी आंतरराष्ट्रीय क्रूझ टर्मिनलाक लागून गोंय हें फुडारांतलें संवसारीक क्रूझ डेस्टीनेशन जातलें आनी अर्थीक वाड आनी थळावे समुदायाचे समृध्दीक चालना मेळटली, अशे एमपीएच्या अधिकाऱ्यान सांगलें. मुरगांव आंतरराष्ट्रीय क्रूझ टर्मिनल पुराय जावपाच्या निमाण्या पांवड्यार आसा आनी गोंयच्या पर्यटन मळाचें रूपरंग बदलपाक सज्ज आसा. हे अत्याधुनीक टर्मिनल इमारतींत 24 इमिग्रेशन कावंटर, 10 चॅक इन कावंटर, प्रशस्त अशें वेटींग लॉन्ज, बॅगेज कॅरावजल, ड्युटी-फ्री दुकानां आनी वेगवेगळ्यो थीम आशिल्लीं वेवसायीक केंद्रां, देशी तशेंच विदेशी लोकांक सेवा दितले, अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
