भांगरभूंय | प्रतिनिधी
येता ते लोकसभा वेंचणुकेंत केंद्रांतल्या भाजपप्रणीत आघाडीक सत्ताभ्रश्ट करपाच्या हेतान आपापसांतले सगले मतभेद, झगडीं कुशीक दवरून एकठांय आयिल्ल्ल्या आनी दिल्लीचे दिकेन वचपी विरोधकांची गाडी पाटणा स्टेशना वयल्यान सुटल्यार अडेज ते तीन म्हयन्यांचो काळ उलगलाे. पाटणा स्टेशना वयल्यान काँग्रेस, आप, तृणमूल, राष्ट्रवादी काँग्रेस, उबाठांची बाकी आशिल्ली सेना मेळून एकोणीस मोदी दुस्मान पक्षांच्या फुडाऱ्यां सयत सुटिल्ली गाडी म्हयनो भरयां बंगळुरू स्टेशनार पावली. थंय आनीक सात पक्षांचें फुडारी हे गाडयेंत चडले. तेन्ना दिसपाक लागिल्लें की आतां नरेंद्र मोदी आनी तांच्या भाजपाची कांय धडगत ना. विरोधकांच्या म्हाएकवटाचेर म्होर लावपी ‘आयएनडीआयए’ हें नांवूय हे गाडयेक बंगळुरूंत दिलें आनी यूपीएचें क्रियाकर्म लेगीत बंगळुरूंत जालें.
आतां खरें म्हणल्यार गाडयेन नेट घेवपाक जाय आशिल्लो. कारण लोकसभा वेंचणुको तर स-सात म्हयन्यांचेर येवन रावल्यात. पूण खंयचे खंय किदें. ही गाडी काय नेट घेवपाक शकली ना आनी अपेक्षे प्रमाण अजूनय दिल्ली कडल्यान तांच्या प्रवासाची दिका निश्चीत जाल्ली दिसना. आतां 31 ऑगस्टाक ही गाडी बरेंच धक्के खायत मुंबय स्टेशनार पावतली अशें सांगतात. तरी अजून ‘आतां फुडें किदें ?’ ह्या प्रस्नाची जाप ‘इंडिया’ महागठबंधनाचो एकूय फुडारी दिवपाक शकना ही वस्तुस्थिती आसा. ‘इंडिया’ महागठबंधन एनडीएक लोकसभा वेंचणुकेंत पुरून उरतली अशें दरेक फुडारी ताळो फोडून सध्या तरी सांगत आसले तरी मजगतच्या काळांत ज्यो घडणुको घडटात त्यो पळयल्यार महागठबंधनाचे हे गाडयेक केन्नाय अपघात जावपाची शक्यताय चड दिसपाक लागल्या.
मुंबय स्टेशनार ‘इंडिया’ गाडी दोन दीस रावतली अशें आसलें तरी ताचे फुडलीं स्टेशनां अजून थारिल्लीं नात, आनी प्रत्यक्ष स्टेशनां सोडून खंयूय चर्चा करची न्हय अशी समज दरेका पक्षाक घातल्यात कांय कल्पना ना. पूण मल्लिकार्जून खर्गे आसूं वा राहूल गांधी, अरविंद केजरीवाल आसूं वा ममता बॅनर्जी, शरद पवार आसूं वा उद्धव ठाकरे कोणूय ताचेर उलोवपाचें धाडस करिनात. हाचे वयल्यान दोन बसका आनी तीन म्हयन्यांचो काळ उलगले उपरांतूय महागंठबंधनाची ठोस अशी एकूय कार्यावळ जाहीर जायना वा ताचेर निर्णयू घेनात. हाका किदें म्हणपाचें. राज्या राज्यांत गठबंधनांतल्या घटक पक्षां मदीं झगडीं जाल्यार नेटान चालू आसात. ताका दिल्ली, बंगाल, महाराष्ट्र, पंजाब, छत्तीसगड हीं राज्यां काय आडवाद नात. आतां मोदी हटाव हो एकसुरो अजेंडा घेवन ही आघाडी लोकसभा वेंचणुकेंत मतदारां सामकार वतली जाल्यार तांच्या पदरांत किदें पडटलें हें सांगपाक भविश्यकाराची गरज नासतली. मोदी दुस्वावान पछाडिल्ल्या विरोधकांक प्रत्यक्ष मतदारां सामकार येवचे पयलीं फुडल्या एक दोन म्हयन्यांत खूब किदें करचें पडटलें. जाका लागून मतदार तुमकां गंभीरपणान घेवपाचो विचार करतले आनी सगल्यांत व्हडली गरज खंयची आसतली तर ती म्हणल्यार महागंठबंधनांतल्या सगल्या पक्षां मदीं पयलीं मनोमीलन जावपाची. जी गजाल सध्या फकत अशक्य आशिल्ल्याचें सध्याचे घडणुकेंतल्यान दिसता.
‘इंडिया’ महागठबंधन आघाडेचें वर्णन प्रधानमंत्री नरेंद्र मोदी ‘घमंडिया’ अशा शब्दांत करतात हें आमी आयकतात. कांय ‘इंडिया’ वाले सध्या मोदी विरोधांत वीख ओंकतना इतले गुर्मींत आनी जोशांत विधानां करतात ताचे खातीर हें वर्णन जाय तशें आसा. अखिलेश यादव, ममता बॅनर्जी, नितीशकुमार अशा कांय फुडाऱ्यांची सध्याची विधानां पळयल्यार तांकां इतलो ठाम विश्वास वा अतीआत्मविश्वास आसा कीं ‘इंडिया’ आतां सामके सत्तेचे धडेर पावल्यात अशें दिसतलें. पूण वस्तुस्थिती खूब वेगळी आसा. आघाडेंतले चडशे घटक पक्ष अजुनूय एकमेकां आड दंड ठोकतात अशें चित्र दरेका सुवातेर दिसता. मतदारां सामकार येतना निदान मनोमीलन तरी ह्या पक्षां मदीं दिसून येवचें ही उण्यांत उणीं अपेक्षा तें बाळगितात, जाल्यार तें चूक म्हणपाक जावचें ना.
आतां दिल्लींतलें चित्र पळोवपाचें जाल्यार आप आनी काँग्रेसीचे फुडारी थंयच्या लोकसभेच्यो सातूय सुवातो आपल्याकूच मेळटल्यो वा आमीच त्यो लढयतले असो निर्धार करत एकमेकां आड आरोप प्रत्यारोप करतात. आतां एकमेकांच्या हड्ड्यार बसप तितलेंच उरलां. सध्या ह्या दोन पक्षां मदीं दिल्लींत जें शाब्दीक झूज सुरू आसा तें पळयल्यार आम आदमी पक्षान मुंबयतले बसकेक बहिश्कार घालून स्वंतत्रपणान वेंचणूक लडोवपाचो निर्णय घेतल्यार कोणाक अजाप दिसपाचें कारण ना. विरोधी एकवटा खातीर ही गजाल अनुकूल अशें नक्कीच म्हणपाक मेळचें ना. सेवा अध्यादेशाक लागून काँग्रेसीक सशर्त इश्टागतीचो हात दिले उपरांत संसदेंत किदें घडटा ताचेर आपाचे केजरीवाल कितले मेरेन समाधानी आसात हें कळपाक मार्ग ना. मात काँग्रेसी पसून पयस रावपा खातीर ते एखाद्रे निमत्त सोदतात आनी ते खातीर तांकां चड वेळ वाट पळयत बसचें पडचें ना अशें म्हणपा सारकी परिस्थिती ना.
मुंबयंत विरोधी आघाडेची जावपी बसका सामकी तोंडार आयिल्ली आसतना महाराष्ट्रांतल्या इश्ट पक्षां मदीं जे मतभेद प्रकर्शान दिसून येतात. ताका लागून दुबावाचें धुकें दिसान दीस चडूच गडद जाता, देखून हे बसकेंत नेमकें किदें जावपाक घातलां हाचो अदमास बांदप कुस्तार जालां. अजीत पवारान काका शरद पवार हांची घेतिल्ली भेट काँग्रेस आनी उबाठ्याच्या बाकी आशिल्ले सेनेक खटकप सभावीक आशिल्लें. उद्धव ठाकरे हे जाल्यार मुंबयचे बसकेचे येजमान आसात. अशा वेळार तांचें अस्वस्थ जावप समजुपा सारकें आसा. शरद पवारांचेर भरवंसो दवरप घातमारें जावपाक शकता अशें महाविकास आघाडेच्या फुडाऱ्यांक दिसता आनी ताचे प्रतिकूल परिणाम बसकेचेर जावपाक शकतात.
पंजाब, पश्चीम बंगाल आनी छत्तीसगडांत हाचे परस वेगळें कितें तरी चालू आशिल्ल्याचो समज कोणूय करून घेत जाल्यार तें बरोबर न्हय. ममता बॅनर्जी हांकां आपल्या राज्यांत काँग्रेस वा दाव्यांची अजिबात ढवळाढवळ नाका. ताचे वयल्यान तर काँग्रेसींत वातावरण तापपाक लागलां. छत्तीसगडाचे भोंवडेर आसतना दिल्लीचे मुख्यमंत्री अरविंद केजरीवाल हांणी थंयच्या शाळांची अवस्था खूब भयानक आशिल्ल्याचें वादग्रस्त विधान केल्ल्यान काँग्रेस फुडाऱ्यांनी ताचे वयल्यान तांकां घेरला. अशे परिस्थितींत विरोधी पक्षां मदीं मनोमीलन कशें जावपाक शकतलें हो लाख मोलाचो प्रस्न आसा. नितीशकुमाराचे हालींचे दिल्ली भेटेंत जायत्या जाणांक गोंदळांत उडयलां. एनडीए आड टक्कर दिवपाची जाल्यार एक दिलान एकठांय आयिल्ल्या पक्षांची भक्कम आघाडी मतदारांक जाय आनी तशे आघाडेक आयचो सूज्ञ मतदार येवकार लेगीत दितलो. मनां जुळयनासतना एकठांय येवन मोदीक धांवडावपाचो हो प्रयोग मतदारांक पट्टलो, अशें गृहीत धरल्यार तातूंतल्यान जावपी परिणामांक तोंड दिवपाची तयारी विरोधकांक दवरची पडटली.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
