पयलीं पुराय स्वातंत्र्य, उपरांतूच प्रकल्प

भांगरभूंय | प्रतिनिधी

मयेंकारः मयें भू विमोचन नागरीक कृती समितीचे बसकेंत सूर

भांगरभूंय । प्रतिनिधी

दिवचलः मयेंच्या स्वातंत्र्याचो लडो अजून लेगीत चालू आसा. कांय लकांक सनदी दिल्यात जाल्यार कांय लोकांक अजून त्यो मेळूंक नात. त्या सनदी संबंदांत कोणेतरी न्यायालयांत याचिका दाखल केल्या, ते संबंदांतूय प्रस्नचिन्न निर्माण जालां. ते खातीर आदीं पुराय स्वातंत्र्य दिवचे खातीर सगळे शक्ती सयत संघटीत रावून न्याय मेळोवन दिवचे खातीर सरकारान विशेश योगदान दिवचें आनी उपरांतूच ह्या वाठारांत प्रदुशण विरयत प्रकल्प उबारचे खातीर यत्न करचे. ताका पुराय तेंको आसतलो, असो सूर आयतारा मयां आयोजीत केल्ले मयें भू विमोचन कृती समितीचे बसकेंत लोकांनी उक्तायलो.

मयां आंतरराष्ट्रीय दर्जाचें कायदो म्हाविद्यालय उबारपाचे प्रक्रियेक चालना दिवचे खातीर चाचपणी सुरू जाल्या. ते संबंदांत बसकेंच चर्चा केली. ह्या वेळार माचयेर आमदार प्रेमेंद्र शेट, यशवंत कारबोटकार, सखाराम पेडणेंकार, दीपक कळंगूटकार, सरपंच कृष्णा चोडणकार हाजीर आशिल्ले.

समितीचे अध्यक्ष सखाराम पेडणेंकार हांणी आयज मेरेनच्या लड्याची फाटभूंय सांगलीं. अजून लेगीत शेतकारांक सरकाराच्या येवजण्यांचो पुराय लाव मेळना अशी खंत तांणी उक्तायली. मुख्यमंत्री आनी आमदार हांणी आदार दिला, ताचीय फाटपुरवण चालू आसा. सरकारी अधिकाऱ्यांक हो प्रस्न खबर आसून लेगीत हें बाबतींत आडखळी निर्माण जातात, अशें खूबश्या लोकांनी सांगलें.

सनदी दिल्यात, पूण अजून लेगीत खूबशे अर्ज तशेंच पडून आसात. ह्या वाटारांत स्वतंत्र उपजिल्होधिकाऱ्याची नेमणूक करून सगळे प्रस्न निकालांत काडचे. तशेंच जांकां संद दिल्या तातूंत कांय कायदेशीर गजालींचो आस्पाव आशिल्ल्यान ह्या सनदी विशींय प्रस्नचिन्न निर्माण जातात, अशें कांय जाणांनी सांगलें.

ह्या वेळार कांय लोकांनी मुक्तीचो लडो 100 टक्के येसस्वी करचे खातीर थारावीक मुजत सरकाराक दिवची, अशी भुमिका मांडली. ताचेरूय चर्चा जाली. कांय उणाव आसात, ते संबंदांत न्यायालयांत याचिका दाखल करची काय कितें हाचेरूय चर्चा जाली. ते उपरांत कायदेशीर सल्लो घेवन फुडली कृती करपाचें थारायलें.

यशवंत कारबोटकार हांणी पुराय मालमत्ता प्रकरणाचो इतिहास लोकां मुखार दवरलो. कशे तरेन आयज मेरेन सगळ्या लोकांनी आदार केलो आनी हे फुडेंय मजत करचे खातीर समन्वयाची भुमिका घेवपाचो आगरो केलो.

सरपंच कृष्णा चोडणकार हांणी सांगलें, उदरगतीक आमचो कसलोच विरोध ना. आमी पुराय गांवा वांगडा आसात. मयेंचो स्थलांतरीत प्रस्न 100 टक्के सुटावो जावपाची गरज आसा. ते खातीर कितें करपाक मेळटा जाल्यार आमी संघटीत यत्न करुंया. गांवांत उदरगतीच्या प्रकल्पाक आडखळ हाडिनासतना प्रदुशण विरयत प्रकल्प येवन ताचो फायदो मयेंकारांक जावचो, हे खातीर सगळ्यांनी आदार करपाची गरज आसा. गांवाक वांगडा घेवनूच पंचायत आपली भुमिका थारायतली, अशेंय तांणी स्पश्ट केलें.

ह्या वेळार तुळशीदास चोडणकार, कृष्णा परब आनी हेरांनी आपली भुमिका मांडली.

पुराय प्रस्नाचेर खोलायेन म्हायती दितना राजेश कळंगूटकार हांणी संगलें, आमचो प्रलंबीत प्रस्न पुराय तरेन सुटपाची गरज आसा. तशेंच सरकाराच्या सगळ्या येवजण्यांचो लाव दरेका घराक मेळप गरजेचें आसा. तातूंत जे काय उणाव आसात ते पयस करपाचो यत्न करचो, अशी तांणी मागणी केली.

आमदार शेट हे मयें प्रस्नाचेर पुराय सतर्क रावून फाटपुरवण करतात, हे खातीर तांकां बसकेंत परबीं दिली.

उदरगतीच्या प्रकल्पाक विरोध नाकाः आमदार

मयें मुक्तीच्या लड्या खातीर खूब जाणांनी योगदान दिलां. तांचो उगडास करतनाच आतां हो उरिल्लो प्रस्न आसा ते विशीं फाटपुरवण करपा खातीर सरकार दरबारांत सगळे तरेचे यत्न करून सगळ्यांक सनदी मेळोवन दिवप, शेतां- बागायतींचें कायदेशीर हक्क दिवपा संबंदांत आपूण फाटपुरवण करतां. मयां सरकाराचे जमनीर एकादो प्रदुशण विरयत प्रकल्प येता जाल्यार ताका कोणेच विरोध करचो न्हय. अखेर उदरगत ही सगळ्यांच्या फायद्या खातीर आसता. गांवचे प्रस्न सोडयतनाच, उदरगतीक लेगीत तेच तरेन उर्बा दिवप गरजेचें आसा, अशें आमदार प्रेमेंद्र शेट हांणी सांगलें.