भांगरभूंय | प्रतिनिधी
इंदोर, खबरां संस्था ः मध्य प्रदेशांतल्या सिधी जिल्ह्यांत एक धक्को दिवपी घडणूक घडली. नातवान पयलीं आपले बायलेचो खून केलो आनी उपरांत आपलोय जीव सोंपयलो. मात हे घडणुकेन सामको दुखेस्त जाल्ल्या आज्यानूय नातवाचे पेटपी चितेंत उडी मारून जीव सोंपयलो. हाका लागून ह्या वाठारांत दुख्ख पातळ्ळां.
पुलिसांनी दिल्ले म्हायती प्रमाण, सिहोलिया गांवांत ही घडणूक घडली. शुक्रारा ३४ वर्सां पिरायेच्या अभयराज यादव हाणें आपली घरकान्न सविता यादव हिचो कुराड मारून खून केलो. उपरांत स्वताय गोळ घेवन जीव सोंपयलो.
ही घडणूक घडले उपरांत तांचेर निमाणे संस्कार केले. निमाणे संस्कार जाले उपरांत आजो रामावतार यादव घरा गेले. उपरांत ते अचकीत बेपत्ता जाले. आजो बेपत्ता जाल्ल्यान गांवकार्यांनी आनी कुटुंबीयांनी तांचो सोद घेतलो. उपरांत शेनवारा सकाळीं बेपत्ता आज्याची अर्दवट लाशिल्ली कूड जंय नातू आनी सुनेचे निमाणे संस्कार केल्ले थंय मेळ्ळी.
मजगतीं, अभयराजान आपले बायलेचो खून कित्याक केलो? हाचे फाटलें कारण आजूनय कळूंक ना. हे विशीं पुलीस तपास करतात.
अभयराज आनी ताचे घरकान्नीचेर निमाणे संस्कार केले उपरांत तांचो आजो ही घडणूक पळोवन मानसीक नदरेन खचिल्लो. उपरांत तांकां हें दुख्ख सोसूंक जावंक नाशिल्ल्यान तांणी हें पावल उबारलें असो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
