भांगरभूंय | प्रतिनिधी
बंगळुरू : कर्नाटकाच्या बेल्लारी जिल्ह्यांतल्या एका खंडणी प्रकरणाची सध्या नेटान चर्चा चालू जाल्या. कारण एका प्रसिद्ध दोतोराचें अपहरण करून वट्ट ६ कोटींची खंडणी मागपी अपहरण करप्यांनी उपरांत ताका सोडून दिलो. मजा म्हणल्यार घरा वचपाक ताका वयर ३०० रुपयाय दिले! पुलीस ह्या प्रकरणाचो खोलायेन तपास करतात. अपहरण करपी मेळूंक नात.
नेमकें कितें घडलें?
बेल्लारी जिल्हो हॉस्पिटलांत बालरोगतज्ज्ञ म्हणून कार्यरत आशिल्ले डॉ. सुनील गुप्ता हाचें शेनवार २५ जानेवारीक अपहरण जालें. सकाळीं ६ च्या सुमाराक ते सूर्यनारायणपेट वाठारांतल्या घरा लागसार शनेश्वर देवळा कडेन पासयेक गेल्ले. तेन्नाच थंय टाटा इंडिगो गाडयेंतल्यान कांय तरणाटे आयले आनी तांणी बळयां सुनील हांकां गाडयेंत बसयले. सीसीटीव्हींत हो सगळो प्रकार पळोवंक मेळटा.
३ कोटी रोख, ३ कोटींचें भांगर
डॉ. गुप्ता हांच्या अपहरणा उपरांत तांचे भाव वेणुगोपाल हांकां व्हॉट्सऍपार एक फोन आयलो. वेणुगोपाल हे बेल्लारी जिल्ह्यांतले सोरो विक्रेते संघटणेचे अध्यक्ष. सुनील हांचे सुटके खातीर अपहरण करप्यांनी वट्ट ६ कोटी रुपयांची खंडणी मागली. हातुंतली अर्दी खंडणी रोख जाल्यार अर्दी भांगराच्या स्वरुपांत.
३०० रुपया दिवन सुटका
वेणुगोपाल गुप्ता हांणी हे विशीं रोखडीच पुलिसांक म्हायती दिली. पुलिसांनी सोद मोहीम सुरू केली. जिल्ह्यांत येवपी वचपी सगळे रस्ते बंद केले. दरेके गाडयेची तपासणी केली. एके वटेन पुलीस चवकशी करताले, जाल्यार दुसरे वटेन अपहरण करप्यांनी डॉ. सुनील हांची सुटका केली. तांचे कडल्यान एक रुपया लेगीत घेनासतना तांकां घरा वचपा खातीर बशीची तिकेट काडपाक वयर ३०० रुपया दिले!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
