भांगरभूंय | प्रतिनिधी
भांगरभूंय । प्रतिनिधी
सावयवेरेंः भारतीय किसान संघ, गोंय प्रदेशाची सावयवेरें हांगच्य रायकार कृशी म्हाविद्यालयांत बसका जावंन शिलवाडो हांगचो शेतकार संजय अनंत पाटील हाका भारत सरकाराचो पद्मश्री पुरस्कार फावो जाल्ले खातीर भौशीक भोवमान करपाचें थारलें. शेनवार 2 मार्चाक सांजे 4.30 वरांचेर सावयवेरेंच्या श्री मननंत सभाघरांत ही भोवमान कार्यावळ जातली.
कार्यावळीक भारतीय किसान संघाचो अखील भारतीय महामंत्री मोहिनी मोहन मिश्र मुखेल सोयरे आनी खासा सोयरो म्हणून केंद्रीय तटीय कृशी अनुसंधान संस्थेचे संचालक डॉ परवीन कुमार हाजीर रावतले. बसकेक भारतीय किसान संघ गोंय प्रांताचो अध्यक्ष संजीव कुंकळ्येकार, महामंत्री श्रीरंग जांभळे, भांडारी विराज बाक्रे, महेश शिलकार आनी हेर वावुरपी आशिल्ले.
भारतीय किसान संघाच्या गोंय प्रांताचो आदलो अध्यक्ष संजय पाटील हाका भारत सरकाराचो पद्मश्री पुरस्कार मेळप ही गोंय तशेंच गोंयां भायल्या शेतकारां खातीर खोशयेची गजाल आसा. शेतकारांच्या उमेदीचे ते प्रतीक आसा. तांच्या जैवीक शेतांतल्या योगदानाचो परिचय करून दिवप आनी तांच्या वावरांतल्या हेरांक प्रेरणा मेळची म्हणून ह्या भोवमान कार्यावळीचें आयोजन केलां अशे संजीव कुंकळ्येकार हाणे सांगलें. भोवमान कार्यावळीक सगल्यांनी हाजीर रावचें अशें आयोजकांनी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
