भांगरभूंय | प्रतिनिधी
श्रीरंगपट्टण, खबरां संस्था: भारतीय कृषी संशोधन परिशदेचे (आयसीएआर) आदले महासंचालक आनी पद्मश्री पुरस्कार जैतिवंत डॉ. सुबण्णा अय्यप्पन हांकां दुबावीत परिस्थितींत मरण आयलें. शेनवारा, १० मेक, कर्नाटकांतले श्रीरंगपट्टणचे कावेरी न्हंयेंत ताची कूड सांपडली. उपरांत पुलिसांक हे विशीं कळयलें. पुलिसांनी चवकशी चालू केल्या.
७ मे सावन बेपत्ता
डॉ. अय्यप्पन आपले बायले सयत म्हैसूराक रावताले. तांकां दोन धुवो आसात. ते ७ मे सावन बेपत्ता आशिल्ले. तांची स्कुटरूय कावेरी न्हंयेचे देगेर सांपडली.
डॉ. सुबण्णा अय्यप्पन कोण?
डॉ. सुबण्णा अय्यपन हे नामनेचे शास्त्रज्ञ. जांकां २०२२ वर्सा ‘ब्लू रिव्होल्यूशन’ खातीर पद्मश्री पुरस्कार भेटयल्लो. अय्यप्पन हांणी एक नुस्तें पोसपाचें तंत्र विकसीत केलां. जातूंतल्यान पुराय भारतांतल्यो नुस्तें पोसपाच्यो आदल्यो पद्दती बदलून गेल्यो. तांच्या ह्या कामाक लागून गांवकारांचे जिणेंत समृद्धी आयली, अन्न सुरक्षा घटमूट जाली आनी दर्यादेग आनी भितरलें प्रादेशीक उत्पादन वाडोवपाक हत्वाची भुमिका केली.
अय्यप्पन हांचो जल्म १० डिसेंबर १९५५ दिसा येलंदूर, चामराजनगर, कर्नाटकांत जालो. १९७५ वर्सा तांणी नुस्तें वेवसाय शास्त्रात पदवी घेतली. उपरांत १९७७ वर्सा तांणी मंगळुरूच्यान नुस्तें वेवसाय पदवी मेळयली. १९८८ वर्सा बंगळुरूच्या कृषी विद्यापीठांतल्यान पीएचडी केली.
मुंबयचें सेंट्रल इन्स्टिट्यूट ऑफ फिशरीज एज्युकेशन (CIFE) आनी भुवनेश्वरांतल्या सेंट्रल इन्स्टिट्यूट ऑफ फ्रेशवॉटर एक्वाकल्चर (CIFA) चें संचालक म्हणून काम केलें. इतलेंच न्हय ते हैदराबादचे संस्थापक मुख्य कार्यकारी अधिकारी आनी राष्ट्रीय नुस्तें वेवसाय विकास मंडळाचे (एनएफडीबी) अधिकारीय आशिल्ले. तांणी कृषी संशोधन आनी शिक्षण विभागाचे (DARE) सचीव म्हणूनय काम पळयलें. तांणी राष्ट्रीय चाचणी आनी कॅलिब्रेशन प्रयोगशाळां खातीर मान्यता मंडळ (NABL) चे अध्यक्ष आनी इंफाळच्या केंद्रीय कृषी विद्यापीठ (CAU) चे कुलगुरू म्हणूनय काम पळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
