भांगरभूंय | प्रतिनिधी
फाटल्या सोमाराच्या लेखांत देश सेवे खातीर लश्करांत वचपाची एक संद आसा, अशें सांगिल्लें. पूण कांय कारणांक लागून तुमकां ती चुकली जाल्यार तुमी मुखार सांगिल्ल्या मार्गां वरवीं थंय वचूं शकतात. आमचें भारतीय लश्कर संवसारांतलें बऱ्यांतलें बरें लश्कर म्हूण ताची सगल्याक वळख आसा. लश्करांत वशिलो मात्तूय चलना, थंय फक्त तुमची गुणवत्ता पळयतात.
यत्ता बारावे उपरांत एनडीएची परिक्षा पास जावंक ना तर पदवी घेतले उपरांत वर्साक दोन खेपो जावपी कंबायन्ड डिफेन्स परिक्षा दिवं येता. इंडियन मिलिटरी अॅकाडेमी, डेहराडून इंडियन नेव्हल अॅकाडेमी, एअर फोर्स अॅकॅडमींत दिल्ले परिक्षेंत जर तुमी पास जायशात, जाल्यार लश्करांतल्या व्हडल्या पदांचेर तुमकां संद मेळपाक शकता. व्हड पदां फक्त पगारा खातीर आसनात, तर तुमकां विवीध निर्णय घेवचे पडटात. तो योग्य आसचो पडटा, देशा खातीर ताचो फायदो जावचो पडटा. ते खातीर तुमकां अभ्यास जाय. त्या पदाचेर पावले उपरांत तुमकां तें कळटलें.
जर तुमकां संद मेळूंक ना जाल्यार निरशेवचें न्हय. पदवे उपरांत तुमी थंय वचपाक शकतात. पूण तुमकां बरे गुण पडपाक जाय. पदवी जाले उपरांत तुमकां एक परिक्षा दिवची पडटा. तातूंत तुमी पास जाले काय तुमकां लश्करांत सहज संद मेळटा. वयल्यो अकादमी तुमकां हे परिक्षे खातीर मजत करपाक शकतात. ह्यो सुवाती थोड्यो आसतात.
फिजिक्स, केमिस्ट्री आनी गणित हे विशय मात पदवेंत आसपाक जाय. मुखार व्हडलो अधिकारी जातलो जाल्यार हे विशय शाळेंत आसतना सावन शिकप, तातूंत आवड दाखोवप गरजेचें. ताचें मार्गदर्शनूय घेवपाक जाय. शारिरीक नदरेन तुमी तंदुरुस्त आसपाक जाय. ते खातीर हायस्कूलांत पावलो काय व्यायाम करपाक लागपाक जाय. विवीध लश्करी भरती अकादमींच्या परिक्षां खातीर फिजिक्स, केमिस्ट्री, गणिताचेर आदारीत प्रस्न आसतात. इंग्लीश, सामान्य ज्ञा, मुळावें एलिमेंटरी गणीत हांचोय आसपाव आसता. दरेका प्रस्नाक चार पर्याय आसतात. नेगेटिव्ह मार्क्सूय आसतात. हाचो अर्थ तुमी एखाद्या प्रस्नाची चुकीची जाप दिशात, तर तुमचे गुण 0.33 कापतात. सामान्य ज्ञान आनी गणित ह्या विशयाच्या प्रस्न तुमकां हिंदींत वा इंग्लिशींत दिवचे पडटात. गोंयच्या विद्यार्थ्यांनी इंग्लीश घेतल्यार अडचण येवची ना.
परिक्षा दिवचे पयलीं बारीकसाणेन सुचोवण्यो वाच्च्यो. हे खातीर सराव करप गरजेचें. गणिताचो पेपर तुमकां धावेचे परिक्षे सारको दिसतलो. पूण हेर पेपर मात पदवी परिक्षेक फावो अशे आसतात. हाका लागून सराव करप चड गरजेचें. मार्गदर्शक तुमकां सांगतलोच. पूण जितलो सराव करशात, तितलें बरें. हे नेम सगल्यांक आसात. इंग्लीश उलोवपाचो, बरोवपाचो, वाचपाचो सराव आसप गरजेचें. हे भाशेचेर प्रभुत्व जाय. शशी थरुर ह्या काँग्रेसीच्या फुडाऱ्याक भाजपान पाकिस्ताना वयल्या हल्ल्या विशीं भुमिका मांडपी पंगडांत घेतला तो हेच खातीर. तांचे इंग्लिशीचेर प्रभुत्व आसा. लश्कराचे परिक्षेंत चालू घडामोडींचेर प्रस्न आसतात. ते खातीर दिसाळीं वाचप गरजेचीं. राज्य आनी राष्ट्रीय मेळून तीन तरी दिसाळीं सद्दां वाचपाक जाय. आतां इंटरनेटाक लागून हें सहज शक्य आसा. आॅपरेशन सिंदूर ही ताजी घडणूक कित्या खातीर घडली, हे सारके प्रस्न येवंक शकतात. जाता तितली म्हायती आसप बरें.
ही परिक्षा चड करून गोंयां भायरूच आसतली. पूण तुमी हाची म्हायती जरुर घेवची. महाराष्ट्रांतली केंद्रा आसात. ती म्हणल्यार मुंबय, ठाणे, नागपूर, पुणें हीं केंद्रांय तुमी घेवपाक शकतात. मात एक मतींत आसुंदी की तुमी आदीं सावन सराव, तयारी करपाक जाय. वयर सांगल्यात ते तीन विशय शाळेंत आसतना पसून घट करात. सर्त परिक्षांचो सराव करता. सामान्य ज्ञान पुस्तकां वाचात. हवाई दळ आसूं वा नौदळ, प्रस्नाची पॅटर्न सादारण तसोच आसता, तो बदलना. तेन्ना आतां पसून तयारेक लागचें.
मजगतीं, सरकारी म्हाविद्यालयांनी हाचे मुखार स्टार्ट अप विशयाचेर तुमकां मार्गदर्शन मेळटलें. हाची घोशणा भोवमानेस्त मुख्यमंत्री डाॅ. प्रमोद सावंत हांणी केल्या. सध्या सांखळे बऱ्योच घडामोडी घडटात, ही बरी गजाल.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
