पत वगडावपी पतसंस्था

भांगरभूंय | प्रतिनिधी

कसलीय अर्थीक संस्था सुरू जाली काय तिचें नेमान आॅडीट जावप, रिजर्व्ह बँके कडल्यान तपासणी जावप गरजेचें.

दुसरो करता तें आपणेंय करचें, अशें सगल्यांकूच दिसता. ते खातीर कांय जाण प्रामाणीकपणान कश्ट करतात. थोडे फटींगपणान करून वयर सरपाक सोदतात. अनुकरण करपी बऱ्या मनशांचो आदर्श घेताच अशें ना. कांय वेळार गणितां चुकतात, एकल्याक लागून दुसरो वा सगलेच त्रासांत पडटात, बदनाम जातात. भितर राजकी मनीस आसल्यार तो परत उबो रावता, मात भावार्थी, दुसऱ्यांचेर विस्वास दवरपी फटवतात! माशेल महिला, व्हिजनरी आनी अष्टगंधा ह्या तीन पतसंस्थांचो फुडार फुडल्या शिगम्या कडेन थारपाची शक्यताय आसा. गैरवेव्हार जाल्ल्या ह्या मिनी बँकांनी रीण वसूल करूंक ना जाल्यार त्यो बंद जावपाची चड शक्यताय. तातूंत कांय जाणांची जीणभराची जोड आसा. चड व्याजाचे आशेन वा सुमारा भायर पयसो आशिल्ल्यांनी ह्या पतसंस्थांनी गुंतवणूक गेल्या.
ह्यो पतसंस्था सरकार ताब्यांत घेवपाक शकना. मात संचालक वा सोसायटीची मालमत्ता ताब्यांत घेवपाक शकता, अशें सहकार मंत्र्यान म्हणलां. मागीर वाट कोणाची पळयतात? बेगीन उत्तरपुजा जावंदी. ह्या पतसंस्थांच्या संचालक मंडळांचेर गैरवेव्हाराचो थपको आसा. भितरलो पयसो कोळहुंदरांनी चाबडायलो काय वाळटींनी? संचालकांची मालमत्ता ताब्यांत घेतले खंय. म्हणजे कितें करतले? तांणी कोर्टांत वचून स्टे हाडली जाल्यार? हाचे पयलीं व्हडल्यो बँको बुडल्यात. तांच्या संचालक मंडळांचेर कितें कारवाय जाल्या? कोणें बंदखण बी भोगल्या? तशी तरतूद ना जाल्यार कायद्यांत बदल कित्याक करिनात? काय राजकी मळा वयलें वारें अर्थीक, सहकारी मळाचेर घुसलां? म्हापसा अर्बन आनी हेर बँकांच्या ‘कांय’ गिरायकांचे सगले पयशे (फक्त मुद्दल, व्याज न्हय) मेळ्ळ्यात. वयल्या तीन पतसंस्थांच्या गिरायकांचे सगले पयशे मेळचे म्हूण यत्न जातलो. निदान तांकां अर्दे तरी ते मेळटले, अशेंय सहकार मंत्री म्हणटात. म्हणटकच 40 लाख गुंतयल्यात, ताका फक्त 20 लाख!! हाका न्याय म्हणपाचो?
पतसंस्था मर्जेंतल्या लोकांक नेम पाळिनासतना लाखांनी रुपयांचीं रिणां दितात. मागीर कोणाचो धंदो बुडलो जाल्यार हे वटेन पतसंस्थाय बुचकळटा. माशेल महिला बँकेंत खंय 18 कोटींचो गैरवेव्हार जाला. संचालकांनी आपल्या दुकानांतलो म्हाल घेवपाक रिणां दिलीं, तीं बुडलीं असो आरोप गुंतवणूकदारांनी केला. ‘अष्टगंधां’त बोगस कागदां वापरून आदले संचालक, अधिकाऱ्यांनी 18 कोटींचो गैरवेव्हार केला, अशें गुंतवणूकदारांचें म्हणणें. कांय संचालकांक अटकूय जाल्ली. नांव अष्टगंधा, मात लोकांक लायलो चुनो!
बँकांनी, पतसंस्थांनी गैरवेव्हार कित्याक जातात? कांय संचालक राजकी फुडारी आसतात. थोड्यो चड व्याज दितात. कोट्यांनी रुपयांची रिणां वळखीच्यांक दितात. थोडे बोगस खातीं उक्तीं करून रीण दितात. तें फारीक जायना जाल्यार ताचेर उदक सोडटात. चडांत चड ग्राहक मेळचे म्हूण चड व्याज, सोंपेंपणी रिणां दितात. प्रामाणीक संचालक मंडळ, अधिकारी आसल्यार पलतडी पावले, नाजाल्यार व्हडें बुडलें. ह्या पतसंस्था, बँकांचें दरवर्सा आॅडीट जाता? अधिकारी फायल वाचून पळयता काय वजन पळोवन ती पास करता? सगल्या अर्थीक संस्थांचें वेव्हार दरवर्सा फक्त गिरायकां खातिरूच न्हय, तर हेर लोकां खातिरूय जाहीर करपाक जाय. बँक बुडटकच संचालक मंडळ ‘पुंडलीक वरदा हरी विठ्ठल’ म्हणून प्रसादाचे दोणे लेंसांत लिपयत पपा काडटात. गिरायकांच्या हातांत पडटा, दोणें बांदपाची सुतली!
कसलीय अर्थीक संस्था सुरू जाली काय तिचें नेमान आॅडीट जावप, रिजर्व्ह बँके कडल्यान तपासणी जावप गरजेचें. वेव्हारांची म्हायती आॅनलायन आसल्यार बरी. गुंतवणूक करप्यांनी ठेविच्या विम्याची मर्यादा, संचालकांचो इतिहास तपासपाक जाय. चड व्याजाचें आकर्शण कोणाक दिसूंक फावना. म्हापसा अर्बन, मडगांव अर्बनाचें जें कितें जालें, ताचे पसून गुंतवणूकदार, बँको- पतसंस्था चलोवपी कितें बोध घेतले व्हय?