भांगरभूंय | प्रतिनिधी
कुडाळ-सिंधुदुर्गाच्या तरणाट्याक अटक
पणजी: गोंय पुलिसांच्या घुंवळे वखदां विरोधी पंगडान (एएनसी) पत्रादेवी चेक नाक्या कुशीक धाड घालून कुडाळ- सिंधुदुर्गच्या 30 वर्सा पिरायेच्या तरणाट्याक अटक केली. ताचे कडल्यान 25.10 लाख रुपया मोलाची 208 ग्राम अॅक्टेसी पावडर आनी 43 अॅक्टेसी गुळयो जप्त केल्यो.
घुंवळे वखदां विरोधी पंगडान दिल्ले म्हायती प्रमाण गोंयांत जावपी पार्ट्यांनी मुंबय सावन अॅक्टोसी गुळयाची पुरवण जायत आशिल्ल्याची म्हायती एएनसीच्या अधिकाऱ्यांक मेळिल्ली. ते प्रमाण अधिक्षक टिकम सिंग वर्मा आनी उपअधिक्षक नेर्लन आल्बुकर्क हांच्या मार्गदर्शना खाला पुलीस निरिक्षक संजीत पिल्ले हांच्या फुडारपणा खाला सहाय्यक उपनिरिक्षक मनोज शिरोडकार, हवालदार उमेश देसाय, युस्टाकिओ फर्नांडीस, कॉन्स्टेबल गोदीश गोलतेकार, योगेश मडगांवकार आनी हेर कर्मचाऱ्यांच्या पंगडान शेनवारा मध्यान रातीं पत्रादेवी चेक नाक्या कुशीक सांपळो रचलो.
ह्याच वेळार गुप्तहेरांनी दिल्ले म्हायती प्रमाण एक तरणाटो थंय आयलो तेन्ना ताची चवकशी केली. पंगडान कुडाळ-सिंधुदुर्ग हांगाच्या 30 वर्सा पिरायेच्या तरणाट्याक ताब्यांत घेवन ताची झडटी घेतली तेन्ना ताचे कडल्यान 25.10 लाख रुपया मोलाची 208 ग्राम अॅक्टेसी पावडर आनी 43 अॅक्टेसी गुळयो जप्त केल्यो. उपरांत एएनसीन दुबाविता आड 20(बी) (ii) (बी),22(बी) आनी 22(सी) खाला गुन्यांव दाखल करून अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
