पत्रकारितेचो धर्म आनी आमी सगले

भांगरभूंय | प्रतिनिधी

पत्रकारितेचोय एक धर्म आसता, पूण ताचे पसून खूब पयस पयस वचत आसात आनी हें चित्र जेन्ना बदलतलें तो बरो दीस आसतलो.

गोंय मराठी पत्रकार संघाच्या स्थापणूक दीस सुवाळ्यांत पुण्याचे एक ज्येश्ठ संपादक सम्राट फडणीस हांणी आयची पत्रकारिता आनी ताचे मुखा वेलीं आव्हानां ह्या विशयाचेर जे विचार उक्तायले ते खूब म्हत्वाचे आसात. पत्रकारितेंतलो तांचो मोटो अणभव. तशेंच आयच्या डिजिटल पत्रकारितेंत तांणी जीं कितें शिखरां गांठल्यात तीं पळयत जाल्यार तांचे कडल्यान आयच्या पत्रकारांनी खूब कितें शिकून घेवपा सारकें आसा. पणजेंतल्या स्थापणूक दीस कार्यावळींत तांणी मांडिल्ले विचार आनी केल्लें मार्गदर्शन खूब म्हत्वाचें थारुये. पत्रकारांक मार्गदर्शन करतना सम्राट फडणीस हांणी म्हणलें की, पत्रकारितेच्या मळार एकदां आपले फाटल्यान संपादक वा आयच्या काळांतली कांय वेगळीं पदां लागलीं की आपल्याक जगाक शिकोवपाची जापसालदारकी आयिल्ल्याच्या भ्रमांत आमी वावुरतात आनी ते खरेंय आसा. आमी कांयच शिकप ना आनी वेगळ्याच जगांत वावुरपाचें हें प्रकार आमकां गोंयांतूय सर्रास दिसून येतात. हाचो अर्थ सम्राट फडणीस हांणी हें स्पश्टपणान सांगलें ना की पत्रकारां कडेन तो मागीर सादो प्रतिनिधी आसूं वा संपादक जाचे कडेन अहंकार मुळांतूच नासचो, आनी ह्या मळार तर अहंकाराक स्थानूच ना. सम्राट फडणीस हांणी ज्यो गजाली सांगल्यो ताची गरज तर आशिल्लीच. पूण तेच बराबर पत्रकारांनी अहंकारी जावन वागचें न्हय, कृती करची न्हय हें सांगपाचीय गरज आशिल्ली अशे तांचे विचार आयकले तेन्ना मनाक दिसून गेलें.
पत्रकारिते बरोबर हेर कांय मळारूय अहंकारी व्यक्ती आमकां नेमान मेळटात. पत्रकारिता म्हणली आनी एखादें वरिश्ठ पद ह्या मळार आपल्याच इश्टांची निसण करून मेळयिल्लें आसत जाल्यार ताका कांयच अंत नासता आनी अशीं उदाहरणां आमच्या दोळ्या मुखार खूबशीं दिसतात.
मानसशास्त्राचो अभ्यास करपी अशे सांगतात की एका मर्यादे मेरेन अहंकार हो आत्मविस्वासाची पातळी वा दृढता दर्शयता. ताचे पेल्यान तो घमेंड म्हणल्यार स्वताच्या सामर्थ्यां विशीं गैरसमजात्मक अहंकार हे अवस्थे कडेन पावता. स्वताच्या कुवतीची, पात्रतायेची आनी स्वताच्या मर्यादांची यथार्थ आनी योग्य जाण आसप, सामकी योग्य आनी आत्मविस्वास वाडोवपी आसले तरी नाशिल्ल्या गुणां विशीं फुकटची पोकळ प्रौढी वा घमेंड चारचौगांत हांशें जावपाक कारण थारता. कारण खूबशे बाबतींत तुमचे परस सरस आशिल्ले संबंदीत मळार वावरत आसतात. ताका लागून तांणी आव्हान दिल्यार तुमचें आयदन उक्तें पडटा वा जाहीरपणान फजेतूय जाता. आतां सम्राट फडणीस हांणी सरळ ह्याच उतरांनी कांय सांगिल्लें नासलें तरी आयच्या विकसीत डिजिटल तंत्रज्ञानाच्या युगांत पत्रकारांक कशें सांबाळून आनी दक्षतापूर्वक काम करपाचें आसा होच मंत्र दिला. आतां अहंकारी पत्रकारांक तातूंतल्यान नेमकें कितें घेवप तो तांचो प्रस्न आसलो तरी संबंदितांक शिटकावणी पुरोशी आसा अशेंय सम्राट फडणीस हांचे विचार आयकले उपरांत कोणाकूय दिसचें. अहंकार एखाद्यां मदीं जरूर आसचो पूण तो मर्यादेंत आसचो. अहम् चे मीठ योग्य प्रमाणांत आसत जाल्यार जिणेरुपी जेवण चविस्ट जावपाक मजत जाता. पूण अहम् च्या मिठाचो अतिरेक जायत जाल्यार ताचें कितें जावंक शकता हें ह्या वेळार सम्राट फडणीस हांणी सांगिल्लें जाल्यार घडये खूबशा जाणांचे दोळे उक्तें जावपाक मजतूच जावपाची.
दिसाळीं हीं समाजाचो हारसो आसतात अशें खूबशे जाण म्हणत आसले तरी आयच्या जमान्यांत हो हारसो खरोच उरला? हाचो विचार करचो पडटा. ह्या हारशाक वेर गेल्ली सामकी दिसता आनी ताचें उदाहरण दिवपाचें आसत जाल्यार गोंया भायरूय वचपाचीय गरज ना. आमी करूं तीच पत्रकारिता असो गैरसमज कांय अहंकारी संपादकांनी करून घेतला आनी अशी पत्रकारिता ही कोणूय समाजाच्या फायद्याची म्हणत आसले तरी म्हणूं. पत्रकारितेंतल्या आव्हानांचेर सम्राट फडणीस खोलायेन उलयले, पूण अशा अहंकारी पत्रकारितेचेरूय ते उलयिल्ले जाल्यार खूब बरें जावपाचें. आतां फक्त गोंयांत हें घडटा अशें हांव म्हणचो ना, पूण अहंकाराच्या रुपांतलो राकेसूय दवरपाची आयज गरज आसा. अहंकार निमाणो विनाशा कडेन वता हें बरोबर आसलें तरी तो मेरेन ताचें जाल्लें लुकसाण भरून येवपी नासता. सम्राट फडणीस हांणी आयचे पत्रकारिते विशीं केल्लें विवेचन ताका लागून खूबच अर्थपूर्ण थारता. संवसारांत खंयूय पत्रकारिता निश्पक्षपाती नाशिल्ल्याचें सम्राट फडणीस जे सांगतात ते सामकें बरोबर आसा आनी ताचेर कोणाचें दुमतूय नासचें. पूण आतां पक्षपाती आनी निश्पक्षपाती हांचे मदलो एक नवोच असो ‘हम करेसो’ पत्रकारिता खूबशे कडेन दिसून येता. अशे पत्रकारितेक अभय दिवप काय ना हाचोय विचार करचो पडटलो.
नकली पत्रकारितेचीं दुकानां घालून वाचकांक सत्य म्हयाती न दिवप हें पत्रकारितेच्या खंयच्या निकशांत बसता हें तरी वाचकांक कळूंक जाय. कोणूय मात्सो आवाज काडीत जाल्यार ताचें नांव काळे वळेरेंत घालून संपादकीय वर्गाक धमकावन संबंदीत खबर आडावप ही खंयची पत्रकारिता? आयची पत्रकारिता बदलत चल्ल्या ती अशी आनी तिका कसलोच धरबंद ना. बदलिल्ल्या ह्या काळांत पत्रकार वा मिडिया म्हणून आमी कितें शिकले असो प्रस्न पडटा अशें फडणीस सांगतात. पत्रकार वा संपादक जाले उपरांत आमी आतां कितें शिकप अशें तांकां दिसता हेंवूय बरोबर आसा आनी अशा मनोवृत्तींतल्यानूच कांय फावटी अहंकारी संपादक जल्माक येता. निकोप पत्रकारिते खातीर अश्यो गजाली खरें म्हणल्यार वर्ज्य आसात. पूण लक्षांत कोण घेता. धनयांनी महसुलाचे जें कितें लक्ष्य थारावन दिल्लें आसता तें ह्या ना त्या मार्गान पुराय केले उपरांत तुमी जी करतात तीच पत्रकारिता अशी पत्रकारितेची सहज सोंपी व्याख्या जाल्या. मागीर अपेक्षा कोणा कडल्यान करच्यो. सम्राट फडणीस हांणी आपल्या उलोवपांत अश्यो खूबशो गजाली सांगल्यो की तरणाट्यां पत्रकारांनी अंतमूर्ख जावन ताचेर विचार केल्यार पत्रकार म्हणून तांकां फुडलो मार्ग खूब सोंपो आनी येसस्वी जावपाक खूबशी मजत जातली. अहंकारी पत्रकारितेचो आदर्श मात कोणेच आपले मुखार दवरचो न्हय होच संदेश तातूंतल्यान मेळटा. पत्रकारितेचोय एक धर्म आसता, पूण ताचे पसून खूब पयस पयस वचत आसात आनी हें चित्र जेन्ना बदलतलें तो बरो दीस आसतलो.

वामन प्रभू
9823196359