भांगरभूंय | प्रतिनिधी
पणजीः टिळक, आगरकार हांचे सारकी पत्रकारिता गोंयच्या ‘भारत’कार हेगडे देसाय, ना. भा. नायक हांणी केल्या आनी तांच्या नांवान पुरस्कार फावो जाल्ल्या पत्रकारांनी विचारांक नवी आत्मजागृताय दिवपाचो वावर केला. गोंयांत ध्येयवादी पत्रकार आयज लेगीत आसात म्हणूनूच गोंयचें अस्तित्व तिगून उरलां अशें धेंपे वाणिज्य महाविद्यालयाचे प्राचार्य डॉ. मनोज कामत हांणी सांगलें.
गोवा मराठी पत्रकार संघटणेन इन्स्टिट्यूट मिनेझिस ब्रागांझा (आयएमबी) हांच्या सहकार्यान सोमारा आयएमबी सभाघरांत आयोजीत केल्ल्या मराठी पत्रकार दिसाच्या कार्यावळीत डॉ. कामत मुखेल सोयरे म्हणून उलयताले. ह्या वेळार मानाचे सोयरे कवी, गीतकार आनी वक्ते प्रसाद कुलकर्णी, आयएमबीचे वांगडी सचीव अशोक परब, गोवा मराठी पत्रकार संघाचे अध्यक्ष वामन प्रभु, उपाध्यक्ष सुरेश नायक, सरचिटणीस सुभाष कृ. नायक माचयेर हाजीर आशिल्ले.
मुखेल सोयऱ्यांच्या हस्तुकीं ‘भारत’ हेगडे देसाय पुरस्काराचे मानकरी र. वि. प्रभुगांवकार, ‘भारतमित्र’ ना. भा. नायक पुरस्काराचे मानकरी रमेश कोलवाळकार हांका पुरस्कार भेटयले. लक्ष्मीदास बोरकार पुरस्कार विजेते अंबाजी कामत हांची भलायकी बरी नाशिल्ल्यान डॉ. मनोज कामत हांणी पत्रकार संघटनेच्या पदाधिकाऱ्यांच्या हाजिरेंत तांच्या घरा तांकां हो पुरस्कार भेटयलो. ह्या वेळार डॉ. प्रदीप बोरकार हांणी काडिल्ल्या लक्ष्मीदास बोरकार हांच्या पोर्ट्रेटाचे अनावरण जालें. लक्ष्मीदास हांचे पूत डॉ. नितीन बोरकार हांकां तें भेट दिलें.
हे कार्यावळीक हजर आशिल्लें ‘गोवन वार्ता’ चे संपादक पांडुरंग गांवकार आनी ‘गुज’चे अध्यक्ष राजतिलक नायक हांचोय ह्या वेळार भोवमान जालो.
प्रिंट मिडिया ‘मृत्युंजय!
पत्रकार लक्ष दिवपी, जागृत, हुशार आसूंक जाय. पत्रकारितेंत वाडिल्ली सर्त आनी अस्थिरताय आसून लेगीत आनी सोशल मिडियाच्या प्रचंड अशा आक्रमणाक तोंड दिवन लेगीत प्रिंट मिडिया तिगल्या. ती ‘मृत्युंजय’ आसा अशें प्रसाद कुलकर्णी हांणी सांगलें. ह्या वेळार यतीन हेगडे, भास्कर नायक, डॉ. नितीन बोरकार, पुंडलीक कळंगुटकार आनी हेरांचो भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
