भांगरभूंय | प्रतिनिधी
भांगरभूंय । खबरां संस्था : खर यत्नांनी आनी जिद्दीन शिमो राखपी वीर सैनिकांक तांच्या सेवे खातीर आमी तांचेर कसलेय उपकार करपाक शकले जाल्यार तें आमचें भाग्य थारतलें. हेच भावनेन उत्तर भारतांतल्या बरेली लश्करी मुख्यालयांत भारतीय सैन्य आनी पतंजली योगपीठ हांचे मदीं वेगवेगळ्या विशयांचेर लक्ष केंद्रीत करपी म्हत्वाची समजिकाय कबलात जाली.
ह्या वेळार पतंजली योगपीठाचे सरचिटणीस आचार्य बालकृष्ण आनी लेफ्टनंट जनरल एन. एस. राजा सुब्रमणी (सी सेंट्रल कमांडांतले जीओसी), लेफ्टनंट जनरल आर. सी. तिवारी (जीओसी, उत्तर भारत विभाग), ब्रिगेडियर अमन आनंद (सेनापती, मुख्यालय णव स्वतंत्र मावंटन ब्रिगेड गट), मेजर विवेक जेकब (सीएलएडब्ल्यू ग्लोबल) हाजीर आशिल्ले.
हे कबलाती खाला योग, आयुर्वेदीक चिकित्सा आनी निरोगीपणाच्या मळार, आमच्या लश्करी भावांच्या भलायके खातीर, गरजेच्या आयुर्वेदीक वखदां विशीं संशोधनाच्या मळार, हिमालयांतल्या वखदीं झाडां आनी वनस्पतीं विशींच्या संशोधनाच्या मळार, म्हायतीच्या मळार आनी तंत्रगिन्याना सावन ऑटोमेशन मेरेनच्या वेगवेगळ्या उपेगाच्या मळार म्हत्वाचें काम पतंजली आनी लश्कर एकठांय करतलें. तशेंच पतंजली कडेन संबंदीत संघटनांनी निवृत्त जवानांक सेवा कार्यांत प्राधान्यान नेमपाचो विचार करतले.
हे चर्चेंत दोंगरां वयल्यान जावपी स्थलांतर आडावपाक आनी शिमेची राखण करप आनी रोजगार आदी खातीर व्हायब्रंट विलेज आनी हेर गजालीं उर्बा दिवपाक तशेंच साधनसुविधा निर्माण करप ह्या विशयांचेर दोनूय वटांनी एकमत जालें.
ह्या प्रसंगाचेर आचार्य बाळकृष्ण हांणी सांगलें की पतंजली हें काम पुराय करपाक आनी राष्ट्रा कडले आपले उपकार मानपाक एकूच संद सोडचीना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
