भांगरभूंय | प्रतिनिधी
पणजी: गोवा पोस्ट मास्टर जनरल हांचे वतीन येवपी ३० जुनाक सकाळीं ११.०० वरांचेर टपाल विभागाची ६२ वी प्रादेशीक स्तरीय डाक अदालत पणजे आयोजीत केल्या. हातूंत गिरायकांच्यो कागाळी सोडयतले. टपाल विभागा कडेन संबंदीत गिरायकांच्यो विवीध कागाळी तशेंच आडखळी ज्यो फाटल्या ६ सप्तकां भितर सोडोवंक ना, तांचो ह्या डाक अदालतींत विचार करतात. टपाल, स्पीड पोस्ट, कावंटर सेवा, बचत बँक सेवा आनी मनिऑर्डर भरपा कडेन संबंदीत कागाळींचो विचार हे डाक अदालतींत करतले.
२० जून,२०२५ मेरेन हे विशींच्यो कागाळी स्विकारतले. ह्यो मूळ कागाळी ज्या अधिकार्यां कडेन केल्यात तांच्यो तारखो, नांवां आनी पदनाम तशेंच हेर गजालींचो तपशील अर्जांत करचो असो उलो टपाल विभागान मारला.
इत्सूक गिरायक पोस्टल सेवां संबंदीची तांचे कागाळीची प्रत सहाय्यक संचालक, पोस्टल सेवा-१, पोस्टमास्टर जनरल हांचें कार्यालय , पणजी – ४०३ ००१ गोंय प्रदेश हांकां धाडूंक शकतात.
टपाल सेवा देशाच्या समाजीक-अर्थीक जिणेंतलो एक म्हत्वाचो भाग. जाचो संबंद दरेका नागरिका कडेन आसा. टपाल विभाग आपल्या गिरायकांच्या समाधाना खातीर, सेवा दिवपा खातीर सगले तरेन यत्न करता. तरी संवादांत तफावत आनी सेवां मदीं कांय आडमेळीं येतात जाका लागून कागाळी निर्माण जातात. असल्यो कागाळी सोडोवपा खातीर विभाग डाक अदालत आयोजीत करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
