भांगरभूंय | प्रतिनिधी
पणजी : ग्रीन रे फावंडेशना वतीन पणजे १० जानेवारीक ग्रीन ग्लो महोत्सवाचें आयोजन केलां. पाड्यावेल्या संस्कृती भवनांत दिवसभर चलपी ह्या महोत्सवांत चित्रपट प्रदर्शन, हरित कुशळटाय, व्हिडिओ ऍडिटिंग कार्यशाळा, पोस्टर प्रदर्शन आनी हेर कार्यावळी आसतल्यो. फावंडेशनाचे प्रवीण सबनीस हांणी ही म्हायती दिली. बुधवारा पणजे जाल्ले पत्रकार परिशदेंत ते उलयताले. ह्या वेळार तोमाझिन कार्दोझ हाजीर आशिल्ले.
सबनीस हांणी सांगलें, महोत्सव गोवा जैव विविधता मंडळ आनी कला आनी संस्कृती खात्याच्या सहकार्यान आयोजीत केला. ह्या वेळार सुहास प्रेमकुमार दिग्दर्शीत लिट्ल प्लॅनेट हो पुरस्कार फावो जाल्लो चित्रपट तशेंच आरती कुलकर्णी हांचो ऑलिव्ह रिडले कासवांचेर लघुपट दाखयतले. नीरज प्रभु व्हिडिओ एडिटिंग कार्यशाळा घेतले. जाल्यार सांजेवेळार मंडळाचे अध्यक्ष डॉ. प्रदीप सरमोकादम हांचें भाशण जातलें.
सकाळच्या सत्रांत हवामान बदल हे विशीं विवीध शाळांच्या इको क्लबान तयार केल्ल्या पोस्टराचें प्रदर्शन जातलें. उपरांत पर्यावरण मोगी तशेंच कार्टूनिस्ट लेक्झी फर्नांडीस हांकां मारिया पिंटो स्मृती हरित पुरस्कार भेटयतले. मारिया पिंटो हांणी पर्यावरणाचे संवर्धन करपा खातीर ग्रीन रे फावंडेशनाची स्थापना केल्ली. ल्हान भुरगीं, विद्यार्थी हातूंत पर्यावरणा विशीं जागृताय निर्माण करपाचें काम फावंडेशनांत करतात. हो महोत्सव सगल्यां खातीर फुकट आशिल्ल्यान हाचो लाव घेवपाचो उलो घेवपाचो उलो सबनीस हांणी मारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
