भांगरभूंय | प्रतिनिधी
भांगरभूंय । खबरां मेज
पणजीः ‘दी विगोवन’ हे प्राण्यां खातीर वावुरपी संस्थेन शेनवार 17 डिसेंबराक गोंय प्राणी मुक्ती रॅलीचें आयोजन केलां. प्राण्यांची छळणूक तशेंच मनरिजवणे खातीर तांचो उपेग करपा आड लोकां मदीं जाग्रुताय करपाचो हेत ही रॅली आयोजीत करपा फाटल्यान आसा.
देशांतल्या वेगवेगळ्या राज्यांतले तशेंच गोंयांतलो प्राणी मोगी हे रॅलींत वांटेकार जातले. प्राण्यांचेर जावपी अन्याय पयस करपा खातीर, ताची जी छळणूक जाता ती रॅली वरवीं उजवाडाक हाडपाचें काम करतले. पाटो हांगच्या डॉ बाबासाहेब आंबेडकार गार्डना कडल्यान शेनवारा सांजे 4 वरांचेर रॅलीक सुरवात जातली आनी आझाद मैदानाचेर ती सोंपतली. प्राण्यां मदी प्रजातीवाद हो भेदभाव करपाचो प्रकार सुरू जाला ताचे आड दी विगोवन संस्था वावुरता. रॅलींत निमाणे भाशणा जातलीं.
अन्न, वस्त्र, प्रयोग, मनरिजवण वा हेर कारणां खातीर प्राण्यांचें शोशण करपा पासून लोकांक परावृत्त करप. प्राण्यांचो त्रास पयस करपा खातीर शिवराक जेंवण जेवप. पर्यावरणाची हानी बंद करपा खातीर प्राणी आदारीत आहार आनी हेर गजाली पसून पयस रावप. दर वर्सा प्राणी आनी हेर संसाधनांचो व्हडा प्रमाणात वापर करून कोट्यांनी प्राण्यांची पैदास करतात. मनश्यान आपले जिणे शैलीत बदल केल्यार जायत्यो गजाली जाग्यार पडपाक शकतात अशें दी विगोवन संस्थेक दिसता आनी ते खातीर ती वावुरता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
