भांगरभूंय | प्रतिनिधी
पणजीः सोमारा सांजवेळा पणजे एका वरांत 2.75 इंच मेरेन पावस पडलो. पावसाक लागून नरकासूर भिजलें. शारांतल्या रस्त्यांचेर उदक सांचलें. हवामान खात्यान 30, 31 ऑक्टोबर आनी 1 नोव्हेंबराक गडगडाटा सयत मध्यम स्वरूपाचो पावस पडपाचो अदमास उक्तायला. ते प्रमाण ह्या तीन दिसां खातीर पावसाचो येलो अलर्ट जारी केल्या.
तीन दीस पावस पडपाची शक्यताय आशिल्ल्यान अंदूंचे दिवाळेचेर पावसाचे सांवट पातळ्ळां. बुधवारा (30 वेर) राज्यांत नरकासूर मिरवणूक जातली. ह्या पावसाचो परिणाम मिरवणुकेचेर जावपाची शक्यताय आसा. 31 तारखेक लक्ष्मीपुजा जातली. ह्या दोगांयचेर पावसाचो परिणाम जावं येता. 1 ते 28 ऑक्टोबर ह्या काळांत राज्यांत सरासरी 10.98 इंच पावस पडला. मजगतीं, वाळपय 16.01 इंच आनी सांखळे 14.67 इंच पावसाची नोंद जाल्या.
सोमारा पणजेंत चडांत चड तापमान 33 डिग्री सेल्सियस आनी उण्यांत उणें तापमान 25 डिग्री सेल्सियस नोंद जालां. मुरगांवां चडांत चड तापमान 32.8 अंश जाल्यार उण्यांत उणें 25 अंश अाशिल्लें. फुडले पांच दीस राज्यांतलें चडांत चड तापमान 33 अंश आनी उण्यांत उणें तापमान 25 अंश सेल्सियस मदीं उरपाची शक्यताय हवामान खात्यान उक्तायल्या. अंदूं 15 ऑक्टोबराक पावस फाटीं सरिल्लो. ‘दाना’ ह्या चक्रीवादळाक लागून पावस परतून पडलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
