भांगरभूंय | प्रतिनिधी
पणजीः पर्यटन मोसम, राजधानी पणजेंत सुरू जाल्लो आंतरराष्ट्रीय चित्रपट महोत्सव (इफ्फी), पोरणें गोंया सेंट फ्रान्सीस झेवियर पवित्र कूड दर्शन सुवाळो आनी तातूंत स्मार्ट सिटी खाला परतून सुरू जाल्लीं कामां, हाका लागून पणजे येरादारी कोंयडेंत व्हड प्रमाणार भर पडल्या. ताचो त्रास थळाव्या लोकांक तशेंच वाहन चालकाक सोंसचो पडटा.
पणजेच्या खूबश्या मुख्य मार्गांचेर स्मार्ट सिटी खाला कामां सुरू केल्यांत. ते खातीर सस्ते खणल्यात. ताका लागून येरादारी वेवस्था परतून परतून विस्कळीत जाता. पर्यटन मोसम, इफ्फी आनी पवित्र कूड दर्शन सुवाळ्याचे फाटभुंयेर सध्या गोंयांत लाखांनी पर्यटक गोंयांत दाखल जाल्यात. गोंयांत आयिल्ले चडशे पर्यटक राजधानी पणजेक भेट दितात. तांकांय हे येरादारी कोंयडीचो त्रास सोंसचो पडटा. गोंयच्या ग्रामीण वाठारांतल्यान हजारांनी लोक नोकरी, वेवसाया निमतान पणजे येतात. तांकां सकाळ, सांजे येरादारी कोंयडेक फुडो करचो पडटा. पुलिसांक हे येरादारी कोंयडेचेर नियंत्रण दवरपाक अपेस येता, हे खातीर तांणी खर नाराजी उक्तायल्या.
मजगतीं, इफ्फी निमतान बांदोडकार मार्गाचेर चित्ररथ प्रदर्शन करपाचें सरकारान थारायल्लें. ते खातीर शेनवारा मिनेझीस ब्रागांझा ते कांपाला वयल्या भलायकी खात्याचे इमारती मेरेनचो एक मुख्य रस्तो येरादारी खातीर बंद केल्लो. ह्या मार्गा वयल्यान येवपी- वचप्यांनी मुख्य शारांत प्रवेश केले उपरांत पणजेच्या भितरल्या रस्त्यांचेर लेगीत कोंयडी जाल्ल्याचें चित्र दिसून आयलें. तशेंच पणजेंतल्यान भायर सरपा खातीर खूब जाणांनी भाटलेच्यान वचपी रस्तो धरिल्ल्यान ह्या मार्गारूय येरादारेची कोंयडी जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
