पणजे म्हानगरपालिका प्रभाग फेररचणूक मसुदो जारी

भांगरभूंय | प्रतिनिधी

एप्रील म्हयन्यांत वेंचणुको जावपाची शक्यताय

पणजीः शार उदरगत खात्यान पणजी म्हानगरपालिकेच्या वेंचणुके खातीर पणजे शाराचो प्रभाग फेररचणूक मसुदो जारी केला. खात्यान ह्या मसुद्यांत सुदारणा करपा खातीर सुचोवण्यो मागयल्यात.

शार उदरगत खात्यान बुधवारा परिपत्रक उजवाडा हाडलां. म्हानगरपालिकेची वेंचणूक ही एप्रील म्हयन्यांत जावपाची शक्यताय आसा अशें शार उदरगत खात्याच्या वरिश्ठ अधिकाऱ्यान सांगलें.

पणजी म्हानगरपालिकेच्या 30 प्रभागांचो फेररचणूक मसुदो उजवाडायला. खात्यान जारी केल्ले सुचोवणे प्रमाण फुडले वेंचणुके खातीर शाराची संख्या आनी शिमो हाचे विशीं तपशील ह्या मसुद्यांत दिल्ले आसात.

हो मसुदो 21 जानेवारी ते 29 जानेवारी 2026 मेरेन, आयतार आनी भौशीक सुटी सोडून हेर सगल्या कामाच्या दिसांनी, कार्यालयीन वेळार मामलेदार, तिसवाडीच्या कार्यालयांत तशेंच पणजी म्हापालीका कार्यालयांत भौशीक तपासणे खातीर उक्तो उरतलो. ह्या काळांत नागरिकांक फेररचणुकेच्या मसुद्या संबंदीत आपल्यो सुचोवण्यो, बदल वा दुरुस्त्यो सादर करपाक मेळटल्यो. मामलेदार, तिसवाडी (पणजी) हांगा सुचोवण्यो करूं येता अशें पणजेच्या शार उदरगत खात्यान जारी केल्ल्या परिपत्रकांत म्हणलां.

हे विशीं अदीक म्हायती दितना खात्याच्या वरिश्ठ अधिकाऱ्यान सांगलें की, सद्या फेररचणूक प्रक्रियेक पणजेच्या आदल्या नगरसेवकान सर्वोच्च न्यायालयांत आव्हान दिलां. पणजे म्हानगरपालिकेन प्रभाग फेररचणूक करचे सोडून राज्य वेंचणूक आयोगान ही प्रक्रिया करची अशें तांणी याचिकेंत मागलां. जर ही याचिका येता त्या सप्तकांत न्यायालयांत लिस्ट जाली जाल्यार आमकां ही प्रक्रिया स्थगीत दवरची पडटली. सद्या खातें म्हानगरपालिकेचे प्रभाग फेररचणूक थारयता जाल्यार हेर पालिकांची फेररचणूक वेचणूक आयोग थारयता.

म्हानगरपालिका वेंचणुके सयत हेर पालिकांच्यो वेंचणुको एप्रील म्हयन्यांत जावपाची शक्यताय आसा. सद्या मार्च म्हयन्यांत परिक्षा चालू आसा, तशेंच चडशे मामलेदार हे एसआयआर प्रक्रियेंत व्यस्त आसात आनी फोंडें विधानसभा पोटवेंचणुकेची प्रक्रिया सुरू आसा. देखून ह्या सगल्या प्रक्रिया मजगतीं ही वेचणूक एप्रील म्हयन्यांत जावये. मार्च म्हयन्यांत पालिकांचो कार्याकाळ सोंपता अशें अधिकाऱ्यान सांगलें.