भांगरभूंय | प्रतिनिधी
-एएनसीच्या अधिकाऱ्यांनी रोपें केले जप्तपणजीः पुलिसांनी गांज्यो धरप ही नवीन गजाल न्हय. पूण पणजे गांज्याचीं पिकावळ पळोवपाक मेळ्ळी. सांत इनेज हांगां काकुलो मॉला लागसार गांज्याचें रोप दिसून आयलें. लोकांचे नदरेक पडटकच हाचे वेल्यान बोवाळ जाले उपरांत घुंवळे वखदा विरोधी पंगडाचे (एएनसी) अधिकारी थंय पावले आनी ते रोप मुळा सयत काडून तपासणे खातीर धाडले. हे रोप कशे आयले, कोणी लायले हाचें विशीं एक गुपीत जावन आसा.
काकुलो मॉला लागसार फुटपाथाच्या कुशीक लायिल्ल्या झाडांनी गांज्याचें हें रोप तोंड आशिल्लें. सुमार एक फुटाचे हें रोप कोणाच्याच लक्षांत येवंक ना. पूण दनपारा सोशल मिडियाचेर ह्या रोपांचो फोटो व्हायरल जालो आनी पणजे स्मार्ट सिटींत खऱ्यांनीच हें रोप गांज्याचें काय असो प्रश्न उप्रासलो.
उपरांत मिडियाचे लक्षांत आयले उपरांत मिडियान हो मुद्दो उखलून धरलो आनी उपरांत ही गजाल एएनसीच्या कानार पडली. एएनसीचे अधिकारी घडणूक थळार पावले आनी तें झाड मुळा सयत हुमटून जप्त केले.
हे विशीं एएनसीचे पुलीस निरीक्षक संजीत पिल्ले हांचे कडेन संपर्क केल्यार, तांणी हें रोप गांज्याचें म्हूण मान्य केले.
हे पुराय रोप गांजाे न्हय. जेन्ना ह्या झाडांक फुलाचे बोंड येता तेन्ना तो गांजाे. पानांचो गांजाे म्हण वापर जायना. पूण हे घडणुकेंत ह्या रोंपाक फुलाचें बोंड येवंक नाशिल्ले. एएनसीन हो रोपो जप्त केला आनी फुडले तपासणे खातीर फॉरेन्सीक प्रयोग शाळेंत धाडला, अशी म्हायती पिल्ले हांणी दिली.
हे विशींचें प्रकरण आमी नोंद केला. ह्या रोपा सयत आशिल्ले मातयेचें नमुने आमी जप्त केल्यात. गांज्याचें पिकावळी खातीर वेगळ्या तरेची जमीन जाय पडटा. देखून आमी रोपाच्या मुळांक लागिल्ली माती आनी सरभोंवतणची माती एकठाय केल्या आनी चाचणे खातीर ताचे नमुने धाडल्यात. चाचणे उपरांतच हें झाड कशे आयले हे कळटले, अशें पिल्ले हांणी सांगलें.
सॅम्पल म्हण आमी पुराय रोप जप्त केला. ह्या रोंपाक गांजा नाशिल्लो आनी त्या झाडाचीं पानां तशेंच बियाे एनडीपीएस कायद्या खाला येनात. पूण गांज्याच्या झाडांची लागवड करप हे बेकायदेशीर आसा. देखून हे विशीं गुन्यांव नोंद करपा विशींची प्रक्रिया चालीक लागतली, अशें पिल्ले हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
