भांगरभूंय | प्रतिनिधी
पणजीः मळा वाठारांत भरतीच्या उदकाच्या पंपींग स्टेशनाक जोडपी पायप घालपाचें काम उरलां. देखून मळा मुखेल रस्त्याचें काम आडखळ्ळां. एकदां उदका स्रोत खात्यान पायप घालपाचें काम पुराय केलें उपरांत स्मार्ट सिटी रस्त्याचे दुरूस्तीचें काम हातांत घेतलें, अशें शार उदरगत खात्याच्या वरिश्ठ अधिकार्यान सांगलें.
विस्तार जंक्शन ते रुआ दे ओरेम मेरेनच्या रस्त्याची पावसाक लागून सामकी बाबत स्थिती जाल्या. रस्तोभर मोटी मोटी फोंडकुलां पडिल्लीं तीं डांबर आनी लोबरांचीं कपयाळीं मारून भरल्यांत. मात ही कपयाळीं सुटपाक लागल्यांत.
रस्त्याचें बारीक काम हातांत घेवचे परस हो रस्तो पुराय बांदचो अशी मागणी थळावे करतात. रस्त्याचें काम हातांत घेवपाचे थारलां. मात पायपलायनीच्या कामांक लागून तें आडकून उरलां.
मळ्यांत पावसांत येवपी बुडटेचो विशय सुटावो करपाक स्मार्ट सिटी खाला सरकार मळा विस्तार जंक्शना सावन व्हडलें पायप घालून तें मळा पंपीग स्टेशनाक जोडटलें. पयलीं रस्तो नवो केले उपरांत हीं पायपां घालपांत कसलोच अर्थ ना, अशें अधिकार्यान म्हणलें.
पावसांत भरतेचें उदक पंप करपी पायप आनी नवो मळा रस्तो हो स्मार्ट सिटी कामाचो भाग आसा. आमी सरकार हें पायप घालपाची वाट पळयतात. मागीर पुराय मळा रस्त्याचें दुरुस्ती काम हातांत घेतले. हो रस्तो गुळगुळीत आनी चकचकीत जातकच प्रवाश्यांची गैरसोय पयस जातली, अशी म्हायती ह्या अधिकार्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
