भांगरभूंय | प्रतिनिधी
पणजीः फाटल्या सप्तकाचे तुळेंत सोमारा पणजी बाजारांत कांय भाजयो मातश्यो सवाय जाल्ल्यो. कांदो, बटाट, टमाट, कोबी, फ्लॉवर, मटार, दुदी मातशे सवाय जाल्ले. हेर भाजयो मात फाटल्या सप्तकांतल्या मोलांत मेळटाल्यो. बाजारांत लसूण, आलें, म्हस्काच्यो शेंगो अजून म्हारगूच आसात. फुडल्या सप्तकांत कांदो आनीक सवाय जावपाची शक्यताय वेपाऱ्यांनी उक्तायल्या.
पणजे बाजारांत कांदो 60 ते 70 रुपया कील आसलो. बटाट आनी टमाट 10 रुपयांनी सवाय जावन दरेकी 40 रुपयांक कील मेळटाले. कोबी 10 रुपयांनी सवाय जावन 40 रुपया कील जाल्लो. फ्लॉवराचो एक नग 10 रुपयांनी सवाय जावन 40 रुपया जाल्लो. मटार 20 रुपयांनी सवाय जावन 140 रुपया कील जाल्ले. कोथमिरीची एक जुडी 5 रुपयांनी सवाय जावन 20 रुपया जाल्ली. जाल्यार वांयगें 20 रुपयांनी सवाय जावन 60 रुपया कील जाल्लें.
बाजारांत गाजर 20 रुपयांनी सवाय जावन परतून 80 रुपया कील जाल्ले. तवशें 20 रुपयांनी वाडून 60 रुपया कील जाल्लें. मिरसांग, ढब्बू मिरसांग, भेंडो, दोडकी, बीट आनी कारलें दरेकी 80 रुपया कील आसलें. वालपापडी 120 रुपया, आलें 160 रुपया जाल्यार लसूण 550 रुपया कील आसलें. लिंबू 5 रुपयांक एक नग, मेथी 25 रुपया, शेपू 20 रुपया, पालक 10 रुपया, कांद्याची पात 15 रुपया, जाल्यार तांबडी भाजी 15 रुपयाक जुडी आसली.
नातलाचे फाटभुंयेर बाजारांत तांतयांचे दर वाडिल्लेच आसात. पणजी बाजारांत सोमारा तांतयां 90 ते 95 रुपया डझन ह्या दरान विकताले. नाल्ल आकारा प्रमाण 30 ते 50 रुपया आशिल्लो. फलोत्पादन मंडळाच्या गाड्यांचेर भेंडो 54 रुपया, कोबी 29 रुपया, गाजर 59 रुपया, वालपापडी 52 रुपया, मिरसांग 46 रुपया, कांदो 53 रुपया, बटाट 37 रुपया जाल्यार टमाट 25 रुपया कील आशिल्ले.
म्हस्काच्या शेंगांक तेजी
फाटले कांय दीस म्हस्काच्या शेंगांची आवक उणी जाल्या. शारांत कांय थारावीक सुवातांचेरूच म्हस्काच्यो शेंगो मेळटाल्यो. ताचो दर 550 ते 600 रुपया कील इतलो आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
