भांगरभूंय | प्रतिनिधी
पणजी : पणजेच्या बाजारांत मानकुराद आंबे परत दाखल जाल्यात. ल्हान मानकुराद आंबो ३ हजार रुपया, जाल्यार मध्यम आकाराचे आंबे ५ हजार रुपया डझन ह्या दरान विकतात. पणजी बाजारांत सध्या कांय थारावीक वेपार्यां कडेंच मानकुराद आंबे विकपाक उपलब्ध आसात. फुडल्या पंदरा दिसांनी बाजारांत आंबे येवप वाडटले. हाका लागून दर आनीक उणें जावपाची शक्यताय वेपार्यांनी उक्तायल्या. ह्यान पयलीं बाजारांत फेब्रुवारी म्हयन्यांत कांय दीस मानकुराद आंबे विकपाक आयिल्ले.
बाजारात अद्याप हापूस आंबे येवंक ना
सोमारा पणजे बाजारांत तोतापुरी आंबे २५० रुपया किलो अशे विकताले. तोरां १००क ४ ते ५ आसलीं. मस्काच्या सांग्यांचें दर देंवलां. बाजारांत ह्यो सांगो ५० रुपयां ६ अश्या दरान विकतात. नाल्ल आकारा प्रमाण ३० ते ५० रुपयाक एक आसा. फाटल्या सप्तकाचे तुळेंत कांय भाजयांच्या दरांत मात्शी वाड जाल्या.
बाजारांत ल्हान लसूण २०० रुपया जाल्यार व्हड लसूण ५०० रुपया किलो आशिल्लें. आल्याचें दर १८० ते २०० रुपया किलो, जाल्यार कांदो आनी बटाट १० रुपयांनी रुपयांनी उणो जावन दरेकी ४० रुपयांनी किलो जालां. टमाट ४० रुपया किलो आशिल्लें. भेंडे, ढब्बू मिरसांगेचें दर दरेकी २० रुपयांनी वाडून १०० रुपया किलो जालां. मिरसांगेचें दर २० रुपयांनी वाडून १२० रुपया जालां. फ्लॉवर ५० रुपया एक असो विकतात. कोबीचें दर ४० रू आसा. वायगीं ६० ते ८० रुपया किलो आशिल्लीं.
बाजारांत वालपापडी दर्जा प्रमाण ८० ते १२० रुपया किलो आशिल्ली. तवशें ८० रु. किलो आशिल्लें. मेथीची एक चुकी २५ रू. , पालक, कांदो पात दरेकी १५ रुपया चुडी आशिल्ली. शेपू २५ रुपया, जाल्यार कोथंबीर ३० रुपयाक एक चुकी आशिल्ली.
फलोत्पादन मंडळाच्या गाड्यांचेर कांदो २३ रू., बटाटा २३ रु., टमाट ३२ रु., वालपापडी ६९ रु., मिरसांग ७० रु., भेंडें ४० रु., गाजर ३१ रु. जाल्यार कोबी १८ रुपयानी किलो अशे विकतात. एक फ्लॉवर २५ रुपया आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
